అంబేద్కర్ సార్వత్రిక విశ్వవిద్యాలయం తన విద్యార్థులకు గొప్ప అవకాశాన్ని అందిస్తోంది. ఇప్పుడు విద్యార్థులు చదువుకుంటూనే ఉద్యోగం చేస్తూ ప్రతి నెలా జీతం (స్టైపెండ్) పొందేలా వీలు కల్పిస్తూ వినూత్న “స్టైపెండ్ ఆధారిత అప్రెంటిస్‌షిప్ ప్రోగ్రాం (SAP)” ను ప్రారంభించింది.
హైదరాబాద్‌లోని యూనివర్సిటీ క్యాంపస్‌లో రిటైలర్స్ అసోసియేషన్ స్కిల్ కౌన్సిల్ ఆఫ్ ఇండియా (RASCI)తో ఒక అవగాహన ఒప్పందం (MOU) కుదిరింది. దీనిపై యూనివర్సిటీ రిజిస్ట్రార్ డా. ఎల్వీకే రెడ్డి, రాసి ఎగ్జిక్యూటివ్ హెడ్ జేమ్స్ రాఫెల్ సంతకాలు చేశారు.
ఈ సందర్భంగా యూనివర్సిటీ వైస్ చాన్స్‌లర్ ప్రొఫెసర్ ఘంటా చక్రపాణి మాట్లాడుతూ, రాసితో MOU కుదుర్చుకున్న మొదటి సార్వత్రిక యూనివర్సిటీ తమదేనని, విద్యార్థులలో చదువుతో పాటు నైపుణ్యాలు పెంపొందించడానికి ఇది గొప్ప అవకాశం అని తెలిపారు.
విద్యార్థులు SAP ప్రోగ్రాం ద్వారా చదువుతో పాటు ఆచరణాత్మక నైపుణ్యాలను పొందడమే కాకుండా, ఆర్థికంగా స్వయం సమృద్ధి సాధించుకోవచ్చు. ముఖ్యంగా, విద్యార్థులు ఈ ప్రోగ్రాంలో చేరితే ప్రతి నెల కనీసం రూ. 7,000 నుండి గరిష్ఠంగా రూ. 24,000 వరకు సంపాదించుకునే అవకాశం ఉంటుంది.
ఈ ప్రోగ్రాం లక్ష్యం విద్యార్థులకు విద్యను కొనసాగించడానికి ఆర్థికంగా సాయపడటం, ఉద్యోగ అవకాశాలు కల్పించడం, ఉత్సాహవంతులను వ్యాపారవేత్తలుగా తీర్చిదిద్దడం. యువత ఉద్యోగానికి కావాల్సిన వాస్తవ నైపుణ్యాలను పొందే అవకాశం SAP ద్వారా లభిస్తుంది.
త్వరలో యూనివర్సిటీ వెబ్‌పోర్టల్‌లో పూర్తి వివరాలను ప్రకటించనున్నట్టు అధికారులు తెలిపారు. తెలంగాణ విద్యార్థులకు చదువుతో పాటు జీతం సంపాదించుకునే ఈ అవకాశం తప్పక ఉపయోగపడుతుంది.
Authors
