తెలుగు రాష్ట్రాల గోదావరి-కృష్ణా జలాల పంచాయితీ ఢిల్లీ వరకు చేరింది. ఏపీ, తెలంగాణ మధ్య అధికారికంగా కొనసాగుతున్న జల వివాదానికి ఫుల్ స్టాప్ పెట్టేందుకు కేంద్రం రంగంలోకి దిగింది. ఈ మేరకు రేపు మధ్యాహ్నం 2:30 గంటలకు కేంద్ర జలశక్తి శాఖ ఆధ్వర్యంలో హై లెవల్ మీటింగ్ జరగనుంది.
ఏపీ-తెలంగాణ సీఎంలకు కేంద్ర ఆహ్వానం:
రెండు రాష్ట్రాల సీఎంలు తమ అధికార ప్రతినిధులు, అజెండాతో సహా ఈ భేటీకి హాజరు కావాలని కేంద్ర జలశక్తి శాఖ ఆహ్వానం పంపింది. ఇప్పటికే ఏపీ సీఎం చంద్రబాబు ఢిల్లీలో ఉంటూ కేంద్ర మంత్రులతో వరుస భేటీలు నిర్వహిస్తున్నారు. బనకచర్లపై చర్చించేందుకు కేంద్ర జలశక్తి మంత్రి సీఆర్ పాటిల్తో కూడా చంద్రబాబు సమావేశం కానున్నారు. మరోవైపు, తెలంగాణ సీఎం రేవంత్ రెడ్డి కూడా ఇరిగేషన్ మంత్రి ఉత్తమ్ కుమార్ రెడ్డి, ఉన్నతాధికారులతో సహా ఇవాళ మధ్యాహ్నం ఢిల్లీకి రాగా, రేపు భేటీలో పాల్గొనబోతున్నారు.
భేటీ కీలకత – బనకచర్లపై ప్రత్యేక దృష్టి:
గోదావరి-కృష్ణా నదులను కలిపే బనకచర్ల అంశంపై ఈ భేటీ ప్రత్యేకంగా దృష్టి సారించనుంది. ఏపీ ప్రభుత్వం ఈ ప్రాజెక్టు ద్వారా మిగులు జలాలు, సముద్రంలోకి వెళ్ళిపోతున్న వృధా నీటిని వినియోగించాలనే ఉద్దేశంతో 200 టీఎంసీలు వాడతామని తెలిపింది. దీనికి సంబంధించిన ప్రతిపాదనలను కేంద్రానికి పంపగా, తెలంగాణ ఫిర్యాదు చేయడంతో సెంట్రల్ వాటర్ కమిషన్ ఆ ప్రతిపాదనలను తిరిగి పంపించింది.
ఏపీ ప్రభుత్వం వ్యాప్కోస్ సంస్థతో సర్వే చేయించి వచ్చిన రిపోర్టును కేంద్రానికి సమర్పించేందుకు సిద్ధమవుతోంది. ఏపీ తీరుపై తెలంగాణ అభ్యంతరం వ్యక్తం చేస్తూ, మొదట రాష్ట్రాల వాటాలు, ప్రాజెక్టుల కేటాయింపులు పూర్తిచేసిన తర్వాత మిగులు జలాలపై చర్చిద్దాం అని, అప్పటివరకు బనకచర్ల అంశాన్ని పక్కన పెట్టాలని కేంద్రానికి సూచిస్తోంది.
తెలంగాణ అభిప్రాయం:
తెలంగాణ ఈ ప్రాజెక్టు వల్ల రాష్ట్రానికి అన్యాయం జరుగుతుందని కేంద్రానికి పలు సందర్భాల్లో ఫిర్యాదు చేసింది. అందువల్ల బనకచర్ల అంశంలో ఎలాంటి నిర్ణయం తీసుకోవాలో, ఏ దిశగా వెళ్లాలో తేల్చుకోవడానికి కేంద్రం ఈ భేటీ ఏర్పాటు చేసినట్లు సమాచారం.
రెండు రాష్ట్రాల సానుకూల సిగ్నల్స్:
కృష్ణా, గోదావరి నదుల జలాల పంచాయితీకి ముగింపు పలకడానికి తాము సిద్ధంగా ఉన్నామని సీఎం రేవంత్ రెడ్డి ఇప్పటికే ప్రకటించారు. అదే విధంగా ఏపీ సీఎం చంద్రబాబూ చర్చలకు అంగీకారం తెలిపారు. అయితే ఈసారైనా చర్చలు ఫలితమిస్తాయా లేదా అనేది చూడాలి.
ప్రజల్లో ఆసక్తి:
- రేపటి భేటీలో నిజంగా బేసిన్లు, భేషజాలు లేకుండా చర్చ జరుగుతుందా?
- కృష్ణా-గోదావరి జలాల లెక్కలు తేలుతాయా?
- బనకచర్ల భవిష్యత్తు ఏమవుతుందన్నది ఇప్పుడు ప్రధాన ప్రశ్నగా మారింది.
Authors
