తెలంగాణ ప్రభుత్వం ప్రతిష్టాత్మకంగా చేపట్టిన ఇందిరమ్మ ఇళ్ల పథకం రాష్ట్రంలోని పేద కుటుంబాల జీవితం మార్చే దిశగా వేగంగా ముందుకు వెళ్తోంది. ఈ పథకంలో భాగంగా ఖమ్మం జిల్లాలోని చింతకాని మండల కేంద్రంలో ఉపముఖ్యమంత్రి మల్లు భట్టి విక్రమార్క చేతుల మీదుగా లబ్ధిదారులకు ఇంటి పట్టాలను పంపిణీ చేశారు. ఈ కార్యక్రమంలో ఒక వృద్ధురాలు తనకు ఇల్లు కలగబోతుందన్న సంతోషంలో ఉబ్బితబ్బిబ్బై, ఉపముఖ్యమంత్రి భట్టి విక్రమార్కకు శిరస్సువంచి నమస్కరించి, సభ వేదికపైనే ఆనందంతో డ్యాన్స్ చేసి అక్కడ ఉన్న వారందరినీ ఆశ్చర్యంలో ముంచెత్తింది. పేదల ఇంటి కల సాకారం చేయడం తన ప్రభుత్వ ధ్యేయమని, రాష్ట్రంలో ఒక్క కుటుంబం కూడా నిలువ నీడ లేకుండా ఉండకూడదని ఉపముఖ్యమంత్రి స్పష్టం చేశారు. ఇల్లు నిర్మాణాన్ని పండుగలా జరుపుకోవాలని, ఎవరి గృహప్రవేశానికి ఆహ్వానిస్తే తప్పకుండా వస్తానని భట్టి సభాముఖంగా హామీ ఇచ్చారు. ప్రతి పేద కుటుంబానికి ఇల్లు, ప్రతి మహిళకు ఆర్థిక స్థిరత్వం అందించాలన్నదే ప్రభుత్వ లక్ష్యమని తెలిపారు.
ఇందిరమ్మ ఇళ్ల పథకంలో భాగంగా సొంత స్థలం ఉన్నా పక్కా ఇల్లు లేని వారికి రూ. 5 లక్షల ఆర్థిక సహాయం ఇవ్వనున్నారు. ఈ మొత్తం ఒకేసారి కాకుండా, ఇంటి నిర్మాణ దశల ఆధారంగా నాలుగు విడతలుగా నేరుగా లబ్ధిదారుల బ్యాంకు ఖాతాలకు జమ చేయబడుతుంది. మొదటి విడతలో ఇంటి బేస్మెంట్ నిర్మాణం పూర్తైన తర్వాత రూ. లక్ష, రెండో విడతలో గోడల నిర్మాణం పూర్తయిన తర్వాత రూ. 1.25 లక్షలు, మూడో విడతలో స్లాబ్ నిర్మాణం తర్వాత రూ. 1.75 లక్షలు, చివరి విడతలో ఇంటి నిర్మాణం పూర్తయిన తర్వాత గృహప్రవేశానికి సిద్ధమైనప్పుడు రూ. లక్ష చెల్లిస్తారు. ఈ విధానంతో లబ్ధిదారులు స్థిరంగా ఇల్లు నిర్మించుకునే అవకాశం కలుగుతుంది.
పూర్తయిన నిర్మాణ దశకు సంబంధించిన ఫోటోలు తీసి మొబైల్ యాప్ ద్వారా అప్లోడ్ చేయాల్సి ఉంటుంది. అధికారులు ఆ ఫోటోలు పరిశీలించిన తర్వాత నిధులు నేరుగా లబ్ధిదారుల ఖాతాలో జమ చేస్తారు. ఈ విధానం ద్వారా పారదర్శకత, వేగం పెరుగుతుందని ప్రభుత్వం భావిస్తోంది. పథకానికి సంబంధించి లబ్ధిదారుల దరఖాస్తులను ప్రజాపాలన కార్యక్రమం ద్వారా స్వీకరించి, వాటిని L1, L2, L3 కేటగిరీలుగా విభజించి అధికారులు పరిశీలిస్తున్నారు. పథకం ప్రకారం అర్హత కలిగిన ప్రతి పేద కుటుంబం త్వరలో ఇల్లు నిర్మించుకునే అవకాశాన్ని పొందనుంది.
ఉపముఖ్యమంత్రి భట్టి మాట్లాడుతూ, తన పీపుల్స్ మార్చ్ పాదయాత్రలో రాష్ట్రవ్యాప్తంగా పేదల కష్టాలను చూశానని, వారి ఇంటి కలను నెరవేర్చే బాధ్యతను ప్రభుత్వం తీసుకుందని తెలిపారు. ప్రతి వారం ఇంటి బిల్లులు చెల్లిస్తామని, పథకంలో అర్హులైన ప్రతి ఒక్కరికి ఇల్లు అందే వరకు ప్రభుత్వం వెనుకాడదని హామీ ఇచ్చారు. ఈ పథకం ద్వారా పేదల జీవన ప్రమాణాల్లో గణనీయమైన మార్పు రానుందని, వారి ఆత్మగౌరవాన్ని పెంచుతుందని అన్నారు. పథకంలో భాగంగా పంపిణీ చేసిన పట్టాలను అందుకున్న వృద్ధురాలి ఆనందం ఈ పథకం పేదల జీవితాల్లో ఎలా వెలుగులు నింపుతోందో చెప్పకనే చెప్పింది. ఇల్లు కట్టుకుని అందులో నివసించడం ఎంతమందికి జీవితంలో గరిష్ట లక్ష్యమో తెలుసునని, ప్రభుత్వ సహకారంతో ఆ కల సాకారమవడం పేదలకు కొత్త ఆశ చూపుతోందని పథకాన్ని పొందిన లబ్ధిదారులు తెలియజేస్తున్నారు.
ఇందిరమ్మ ఇళ్ల పథకం వల్ల పేదలు తమ ఇంటి కలను సాకారం చేసుకోవడమే కాకుండా, ఆర్థికంగా కూడా స్వయంపూర్ణత సాధించడానికి దోహదపడుతుందని ప్రభుత్వం భావిస్తోంది. ఈ పథకం పేదల ఆశలు నిజం చేస్తూ, వారిని ఆత్మగౌరవంతో నిలిపే దిశగా తెలంగాణ ప్రభుత్వం కీలకంగా ముందుకు వెళ్తుందని స్పష్టమవుతోంది.
Authors
