కృష్ణా జిల్లా గుడివాడలో ఇటీవల కాలంలో పెరుగుతున్న ద్విచక్ర వాహనాల చోరీలపై పోలీస్ శాఖ చర్యలకు దిగింది. గుడివాడ పట్టణంలోని వన్ టౌన్ పోలీసులు నిర్వహించిన దాడుల్లో, ఐదు జిల్లాల్లోని పలు ప్రాంతాల్లో బైక్‌లను చోరీ చేస్తున్న ఇద్దరు నిందితులను అదుపులోకి తీసుకున్నారు.
ఈ సందర్భంగా డీఎస్పీ ధీరజ్ వినిల్ మీడియాతో మాట్లాడుతూ, నిందితులలో ఒకరు ఆటో డ్రైవర్ కాగా మరొకరు తాపీ పని చేస్తున్న వ్యక్తి అని తెలిపారు. వారు గత కొంతకాలంగా పార్కింగ్ ప్రదేశాలు, బిజీ రోడ్లపై అనుమానం రాకుండా చోరీలకు పాల్పడుతూ ఉన్నట్లు విచారణలో వెల్లడైందని ఆయన పేర్కొన్నారు.
పోలీసులు నిందితుల వద్ద నుంచి రూ. 6.5 లక్షల విలువ చేసే 14 ద్విచక్ర వాహనాలను స్వాధీనం చేసుకున్నారు. ఈ వాహనాలను మీడియా ముందు ప్రదర్శించారు. నిందితులను త్వరలో కోర్టులో హాజరుపర్చనున్నామని డీఎస్పీ స్పష్టం చేశారు.
నిందితులు ఐదు జిల్లాల్లోని 11 పోలీస్ స్టేషన్ పరిధుల్లో వివిధ చోరీలు చేసినట్టు తెలిసిందని తెలిపారు. వారి చరిత్రపై పూర్తి విచారణ జరుపుతున్నట్టు చెప్పారు.
ఈ దొంగలను పట్టుకునే బాధ్యతను భుజాలపై వేసుకుని సమర్థవంతంగా నిర్వహించిన వన్ టౌన్ సీఐ కె. శ్రీనివాస్, ఎస్సై గౌతమ్ కుమార్, ఇతర పోలీస్ సిబ్బందిను డీఎస్పీ ప్రత్యేకంగా అభినందించారు. చాకచక్యంగా వ్యవహరించినందుకు వారికి రివార్డులు కూడా అందజేశారు.
ఈ అరెస్ట్ కేసు గుడివాడలో మాత్రమే కాక, చోరీలకు హాట్‌స్పాట్‌గా మారుతున్న ప్రాంతాల్లో ప్రజలకు కొంతవరకు ఉపశమనం కలిగించింది.
Authors
