మచిలీపట్నంలో రాష్ట్ర ప్రభుత్వ ఉత్తర్వులు అమలుకాకపోవడంపై ప్రజల్లో ఆగ్రహం పెరుగుతోంది. ఈ అంశంపై మచిలీపట్నం బార్ అసోసియేషన్ మాజీ అధ్యక్షులు లంకిశెట్టి బాలాజీ తీవ్ర అసంతృప్తి వ్యక్తం చేశారు.
ఆగస్టు 1 నుంచి మున్సిపాలిటీలు, కార్పొరేషన్లలో ఏ విధమైన రుసుము చెల్లించకుండా ఆస్తి పన్ను పేరు మార్పిడి జరగాలి అనే రాష్ట్ర ప్రభుత్వ సర్కులర్ అమలులో విఫలమైందని బాలాజీ ఆరోపించారు. మంగళవారం విలేకరులతో మాట్లాడిన ఆయన మాట్లాడుతూ, “ప్రజల సౌకర్యం కోసం స్లాట్ సిస్టమ్ ప్రవేశపెట్టి, 24 గంటల్లో పేరు మార్పు చేస్తామని ప్రభుత్వం చెప్పింది. కానీ ఇప్పుడు 24 గంటలు కాదు, 24 రోజులు దాటినా మ్యుటేషన్ జరగడం లేదు” అని విమర్శించారు.
బాలాజీ తెలిపారు, ఈ పరిస్థితి అధికారుల నిర్లక్ష్యం, సమన్వయ లోపం అని. జిల్లా కలెక్టర్ తక్షణం జోక్యం చేసుకొని రాష్ట్ర ప్రభుత్వ సర్కులర్ను కచ్చితంగా అమలు చేయాలని ఆయన డిమాండ్ చేశారు. “ఆస్తి పన్ను పేరుమార్పులు జరగకపోవడం వల్ల బిల్డింగ్ ప్లాన్లు పెండింగ్లో ఉన్నాయి. దాంతో భవన నిర్మాణాలు ఆగిపోయాయి, కార్మికులకు పని లేకుండా పోయింది” అని ఆవేదన వ్యక్తం చేశారు.
ఈ పరిస్థితి ప్రభుత్వం ఆదాయానికే నష్టం కలిగిస్తోందని బాలాజీ పేర్కొన్నారు. ప్లాన్లు ఆమోదం కోసం వేచి ఉండటం వల్ల నిర్మాణ రంగం స్తంభించిపోతోందని, తద్వారా ఆర్థిక వ్యవస్థపై ప్రతికూల ప్రభావం పడుతోందని చెప్పారు.
“ప్రజలకు ఇబ్బందులు తలెత్తకుండా వెంటనే ఆస్తి పన్ను పేరు మార్పు ప్రక్రియను వేగవంతం చేయాలి. రిజిస్ట్రేషన్, కార్పొరేషన్ అధికారులు రాష్ట్ర సర్కులర్ను వెంటనే అమలు చేయాలి” అని బాలాజీ స్పష్టం చేశారు.
Authors
