అమెరికాలో శాశ్వత నివాసానికి మార్గమయ్యే గ్రీన్ కార్డ్ కోసం కోట్లాది మంది ఎదురుచూస్తుంటారు. ముఖ్యంగా భారతీయులు ఈ జాబితాలో ఎక్కువగా ఉంటారు. అయితే అమెరికా ప్రభుత్వం తరచూ ఉద్యోగ ఆధారిత గ్రీన్ కార్డ్ వర్గాలపై కొత్త నియంత్రణలు విధించడం వల్ల వలసదారులు ఇబ్బందులు పడుతున్నారు. తాజాగా మరోసారి గ్రీన్ కార్డ్ మార్గంలో ప్రధాన విభాగాన్ని నిలిపివేసింది.
ఉద్యోగ ఆధారిత వీసాల కేటగిరీలలో EB-3, EW (అదనపు కార్మికులు) వర్గాలపై ఇకపై కొత్తగా గ్రీన్ కార్డులు జారీ చేయబోమని అమెరికా ప్రకటించింది. 2025 ఆర్థిక సంవత్సరానికి ఈ విభాగాలకు కేటాయించిన పరిమితి చేరుకుందని కారణంగా చెప్పింది. దీంతో కొత్త అప్లికేషన్లు వచ్చే అక్టోబర్ 1 వరకు నిలిపివేయబడనున్నాయి. ఇదే విధంగా కొద్ది రోజుల క్రితమే EB-1, EB-2 వర్గాలపైనా నిలిపివేత నిర్ణయం తీసుకుంది. అంటే ప్రస్తుతం అమెరికాలో ఉద్యోగ ఆధారిత గ్రీన్ కార్డ్ అవకాశాలు దాదాపు నిలిచిపోయినట్లే అయ్యింది.
EB-3 వర్గం సాధారణంగా ప్రొఫెషనల్స్, నైపుణ్యం కలిగిన కార్మికులు, అనుభవజ్ఞులైన ఉద్యోగులను కలిగి ఉంటుంది. EW వర్గం మాత్రం తక్కువ శిక్షణతో చేసే పనులకు సంబంధించినది. ఈ రెండు వర్గాలు భారతీయులకు అత్యంత ప్రాధాన్యం కలిగినవి. ఎందుకంటే అమెరికాలో ఇప్పటికే పని చేస్తున్న వేలాదిమంది H-1B వీసా దారులు ఈ మార్గాల ద్వారానే గ్రీన్ కార్డ్ కోసం దరఖాస్తు చేస్తారు. ఇప్పుడు ఇవి కూడా మూసివేయబడటంతో వారికి ఎదురుచూపులు మరింత పెరిగాయి.
భారతీయులు గ్రీన్ కార్డ్ కోసం ఎదురుచూడాల్సిన సమయం ఎప్పటికప్పుడు పెరుగుతూనే ఉంది. ఇప్పటికే EB-2, EB-3 వర్గాలలో పదేళ్లకుపైగా వెయిటింగ్ లిస్టు ఉంది. ఈ కొత్త నిర్ణయంతో మరికొన్ని నెలలు కనీసం కొత్త ప్రాసెసింగ్ జరగదని స్పష్టమైంది. దీంతో గ్రీన్ కార్డ్ కల కోసం ఎదురుచూస్తున్న లక్షలాది భారతీయ ఐటీ నిపుణులు, వృత్తి నిపుణులు నిరాశకు గురయ్యారు.
ఈ పరిస్థితి కారణంగా చాలా మంది ప్రత్యామ్నాయ మార్గాలను పరిశీలించడం ప్రారంభించారు. ముఖ్యంగా EB-5 ఇన్వెస్టర్ వర్గం వైపు దృష్టి మళ్లుతోంది. ఇందులో పెట్టుబడులు పెట్టిన వారికి తక్కువ సమయం లోపల గ్రీన్ కార్డ్ లభించే అవకాశం ఉంటుంది. అయితే ఇది సాధారణ ఉద్యోగులకు అందని మార్గం. భారీ మొత్తంలో పెట్టుబడి అవసరమవుతుంది. అందువల్ల చాలామందికి ఇది సాధ్యం కాని మార్గంగా మారింది.
వలస నిపుణులు చెబుతున్న దాని ప్రకారం, అమెరికా ప్రభుత్వం ప్రతి ఏడాది ఉద్యోగ ఆధారిత గ్రీన్ కార్డులకు ఒక పరిమితి విధిస్తుంది. ఆ సంఖ్య పూర్తయిన తర్వాత మరుసటి ఆర్థిక సంవత్సరంలోనే మళ్లీ జారీ మొదలవుతుంది. 2025 అక్టోబర్ వరకు మరోసారి కొత్త ప్రాసెసింగ్ జరగదని ఈ నిర్ణయం ద్వారా స్పష్టమైంది. ఇది అమెరికాలో ఉన్న వలస కార్మికులపై ఆర్థిక, మానసిక ఒత్తిడి పెంచుతుందని వారు చెబుతున్నారు.
అమెరికా వలస విధానాలు ఇటీవలి కాలంలో మరింత కఠినతరమవుతున్నాయి. గ్రీన్ కార్డ్ పొందడం కోసం భారతీయులు తరచుగా పదేళ్లకు పైగా వేచి ఉండాల్సి వస్తోంది. ఈ విరామాలు, నిలిపివేతలు వారికి కొత్త ఆశలు కలిగించే బదులు మరింత నిరాశను మిగులుస్తున్నాయి. అమెరికాలో స్థిరపడాలని కలలుగంటున్న నైపుణ్య వృత్తి నిపుణులకు ఇది పెద్ద సవాలుగా మారింది.
భవిష్యత్తులో ఈ విధమైన నిలిపివేతలు తరచూ జరుగుతూనే ఉంటాయని నిపుణులు హెచ్చరిస్తున్నారు. అమెరికాలో ఉద్యోగాలు ఉన్నా, గ్రీన్ కార్డ్ సాధనలో ఇలాంటివి పెద్ద అడ్డంకులుగా నిలుస్తున్నాయి.
Author
