సికింద్రాబాద్:- వృద్ధాప్యంలో గుండె ఆపరేషన్ అంటేనే భయపడే పరిస్థితుల్లో, ఓపెన్ హార్ట్ సర్జరీ అవసరం లేకుండానే 72 ఏళ్ల వృద్ధురాలికి మిట్రల్ వాల్వ్ లీకేజీపై విజయవంతంగా చికిత్స అందించి సికింద్రాబాద్లోని మెడికవర్ హాస్పిటల్స్ వైద్యులు అరుదైన విజయం సాధించారు.
కొన్ని నెలలుగా శ్వాస తీసుకోవడంలో ఇబ్బంది, చిన్న పని చేసినా ఆయాసం, తీవ్రమైన అలసట వంటి సమస్యలతో బాధపడుతున్న వృద్ధురాలు మొదట ఇవన్నీ వయస్సు ప్రభావమని భావించి నిర్లక్ష్యం చేశారు. అయితే పరిస్థితి విషమించి గుండె వైఫల్య లక్షణాలతో ఆసుపత్రిలో చేరాల్సి వచ్చింది. వైద్య పరీక్షల్లో ఆమె మిట్రల్ వాల్వ్లో తీవ్రమైన లీకేజ్ ఉన్నట్లు గుర్తించారు.
వైద్యుల వివరాల ప్రకారం, భారతదేశంలో 65 ఏళ్లు పైబడిన వారిలో ప్రతి 10 మందిలో ఒకరికి గుండె వాల్వ్ సంబంధిత సమస్యలు ఉండే అవకాశం ఉంది. రోగి వయస్సు మరియు ఆరోగ్య పరిస్థితిని దృష్టిలో ఉంచుకుని ఓపెన్ హార్ట్ సర్జరీ ప్రమాదకరమని భావించిన వైద్యులు, మల్టీడిసిప్లినరీ హార్ట్ టీమ్ ద్వారా కేసును సమగ్రంగా పరిశీలించారు.
అనంతరం కాథెటర్ ఆధారిత మినిమల్ ఇన్వేసివ్ పద్ధతిలో చికిత్స నిర్వహించారు. కాలి రక్తనాళం ద్వారా చిన్న ట్యూబ్ను పంపించి, ఆధునిక ఇమేజింగ్ సాయంతో వాల్వ్ లీకేజీని తగ్గించే విధంగా ప్రక్రియను పూర్తి చేశారు. ఈ విధానం వల్ల పెద్ద శస్త్రచికిత్స అవసరం లేకుండా, రోగి తక్కువ సమయంలోనే కోలుకునే అవకాశం లభించింది.
ఈ సందర్భంగా డా. ప్రమోద్ కుమార్ కుచులకంటి మాట్లాడుతూ, “వృద్ధుల్లో కనిపించే ఆయాసం, అలసటను కేవలం వయస్సు కారణంగా తీసుకోకూడదు. సకాలంలో పరీక్షలు చేయించుకుంటే ఓపెన్ హార్ట్ సర్జరీ అవసరం లేకుండానే ఆధునిక పద్ధతుల్లో సురక్షితంగా చికిత్స అందించవచ్చు. హార్ట్ టీమ్ సమిష్టి నిర్ణయం వల్ల ప్రతి రోగికి తగిన చికిత్సను ఎంపిక చేయడం సాధ్యమవుతోంది,” అని తెలిపారు.Securenrabad News
ప్రస్తుతం రోగి ఆరోగ్యం స్థిరంగా ఉండి, శ్వాసలో గణనీయమైన మెరుగుదల కనిపించిందని, రోజువారీ పనులు స్వయంగా చేసుకుంటున్నారని వైద్యులు తెలిపారు. మెడికవర్ హాస్పిటల్స్ యాజమాన్యం సహకారంతో ఇటువంటి అత్యాధునిక గుండె చికిత్సలను ప్రజలకు అందుబాటులోకి తీసుకువస్తున్నామని వైద్య బృందం వెల్లడించింది.
Author
