వేటపాలెం, ఫిబ్రవరి 26: మహిళలు, విద్యార్థినుల రక్షణే ధ్యేయంగా బాపట్ల జిల్లా పోలీస్ యంత్రాంగం ముందడుగు వేస్తోంది. బాపట్ల జిల్లా ఎస్పీ శ్రీ బి. ఉమామహేశ్వర్ ఐపీఎస్ గారి ఆదేశాల మేరకు, చీరాల డిఎస్పి ఎం.డి. మోయిన్ సూచనలతో.. గురువారం వేటపాలెం జిల్లా పరిషత్ బాలికోన్నత పాఠశాలలో చీరాల సబ్ డివిజన్ శక్తి బృందం ఆధ్వర్యంలో విద్యార్థినులకు ప్రత్యేక అవగాహన కార్యక్రమం నిర్వహించారు.
శక్తి యాప్తో తక్షణ రక్షణ
ఈ కార్యక్రమంలో శక్తి టీమ్ కానిస్టేబుల్ కె. సుబ్బారావు మాట్లాడుతూ, ఆపదలో ఉన్న మహిళలకు ‘శక్తి యాప్’ ఒక రక్షణ కవచంలా పనిచేస్తుందని వివరించారు. ఈవ్ టీజింగ్, బాల్య వివాహాల వంటి సామాజిక అరిష్టాలను అరికట్టడంలో ఈ యాప్ కీలకమని, అత్యవసర సమయంలో బటన్ నొక్కితే చాలు పోలీసులు వెంటనే స్పందిస్తారని భరోసా ఇచ్చారు.
అవగాహన అంశాలు:
- గుడ్ టచ్ – బ్యాడ్ టచ్: విద్యార్థినులు అపరిచితుల పట్ల ఎలా అప్రమత్తంగా ఉండాలో, ఎవరైనా ఇబ్బంది పెడితే వెంటనే తల్లిదండ్రులకు లేదా ఉపాధ్యాయులకు ఎలా తెలపాలో వివరించారు.
- సైబర్ భద్రత: సోషల్ మీడియాలో వచ్చే అపరిచిత లింక్లను క్లిక్ చేయవద్దని, వ్యక్తిగత సమాచారాన్ని పంచుకోవద్దని హెచ్చరించారు.
- హెల్ప్ లైన్ నంబర్లు: ఏదైనా సమస్య ఎదురైతే తక్షణమే 112, 181, 1091, 1098, 1972 నంబర్లకు సమాచారం అందించాలని సూచించారు.
- చట్టాలపై అవగాహన: చిన్న పిల్లలపై లైంగిక వేధింపుల నిరోధక చట్టం (పోక్సో) గురించి విద్యార్థులకు అవగాహన కల్పించారు.
‘గంజాయి వద్దు బ్రో’ స్కిట్ ప్రత్యేక ఆకర్షణ
మత్తు పదార్థాల వినియోగం వల్ల కలిగే అనర్థాలను వివరిస్తూ, చిన్నగంజాం డి అడిక్షన్ సెంటర్ నిర్వాహకులతో కలిసి శక్తి టీమ్ విద్యార్థులచే ‘గంజాయి వద్దు బ్రో’ అనే స్కిట్ను ప్రదర్శింపజేశారు. ఈ ప్రదర్శన విద్యార్థులను విశేషంగా ఆకట్టుకోవడమే కాకుండా ఆలోచింపజేసింది.Bapatla Local News
పాల్గొన్న ప్రముఖులు: ఈ కార్యక్రమానికి పాఠశాల ప్రధానోపాధ్యాయురాలు దేవరకొండ సరోజిని అధ్యక్షత వహించగా.. వేటపాలెం ఎస్సై పి. జనార్దన్, డి అడిక్షన్ సెంటర్ నిర్వాహకులు సయ్యద్ నాగూర్ భాషా, సి.హెచ్. రంగనాయకులు, కోటేశ్వరరావు, పాఠశాల ఉపాధ్యాయ బృందం మరియు విద్యార్థులు పెద్ద సంఖ్యలో పాల్గొన్నారు.
Author
