– బాపట్లకు చెందిన షేక్ సయ్యద్కు 14 రోజుల రిమాండ్ – నిందితుడిపై ఇప్పటికే వివిధ ప్రాంతాల్లో 7కు పైగా కేసులు: సీఐ నాయబ్ రసూల్
తెనాలి రూరల్, మార్చి 4: సోషల్ మీడియా వేదికగా మహిళా నాయకులను లక్ష్యంగా చేసుకుని అసభ్యకర మరియు అసత్య ప్రచారాలకు పాల్పడుతున్న బాపట్లకు చెందిన వైసీపీ సోషల్ మీడియా ప్రతినిధి షేక్ సయ్యద్ను తెనాలి రూరల్ పోలీసులు బుధవారం అరెస్ట్ చేశారు. తెనాలి మండలం అంగలకుదురు గ్రామానికి చెందిన ఐటీడీపీ (iTDP) నాయకురాలు జెట్టి రేణుక ఫిర్యాదు మేరకు ఈ చర్యలు తీసుకున్నట్లు పోలీసులు వెల్లడించారు.
దుష్ప్రచారంపై పోలీసుల కొరడా
టీటీడీ చైర్మన్కు సంబంధించిన ఒక వ్యవహారాన్ని సాకుగా చూపి, జెట్టి రేణుక వ్యక్తిత్వాన్ని హననం చేసేలా సయ్యద్ సోషల్ మీడియాలో పోస్టులు పెట్టారు. దీనిపై బాధితురాలు ఫిర్యాదు చేయడంతో రంగంలోకి దిగిన తెనాలి రూరల్ పోలీసులు నిందితుడిని అదుపులోకి తీసుకున్నారు. బుధవారం అతడిని రెండవ మున్సిఫ్ మెజిస్ట్రేట్ కోర్టులో హాజరుపరిచారు.
14 రోజుల రిమాండ్
కోర్టులో పోలీసుల తరఫున ఏపీపీ (APP) పరిసపోగు సునీల్ కుమార్ బలమైన వాదనలు వినిపించారు. వాదోపవాదాల అనంతరం న్యాయస్థానం నిందితుడు షేక్ సయ్యద్కు 14 రోజుల రిమాండ్ విధించినట్లు రూరల్ సీఐ నాయబ్ రసూల్ మీడియాకు తెలిపారు.
పాత నేరస్తుడే..
నిందితుడు సయ్యద్ గతంలో కూడా ఇలాంటి అనేక చర్యలకు పాల్పడినట్లు విచారణలో తేలింది. బాపట్ల సహా పలు ఇతర పోలీస్ స్టేషన్లలో ఇతనిపై ఇప్పటికే 7కు పైగా సోషల్ మీడియా కేసులు నమోదై ఉన్నాయని సీఐ వివరించారు. రాజకీయ పక్షపాతంతో మహిళలపై అసభ్యకరంగా పోస్టులు పెట్టే వారిపై చట్టపరంగా కఠిన చర్యలు తీసుకుంటామని ఆయన హెచ్చరించారు.http://TENALI NEWS
Author
