రేపల్లె: అగ్రిగోల్డ్ బాధితులు ఎదుర్కొంటున్న సుదీర్ఘ కాలపు కష్టాలను తీర్చేందుకు రాష్ట్ర ప్రభుత్వం సత్వరమే చర్యలు చేపట్టాలని అగ్రిగోల్డ్ కస్టమర్స్ అండ్ ఏజెంట్స్ వెల్ఫేర్ అసోసియేషన్ రేపల్లె ఏరియా కన్వీనర్ గొట్టుముక్కల బాలాజీ డిమాండ్ చేశారు. సోమవారం రేపల్లెలోని సిపిఐ కార్యాలయంలో చిలకాల శ్రీనివాసరావు అధ్యక్షతన అగ్రిగోల్డ్ బాధితుల సమావేశం నిర్వహించారు.
ఈ సందర్భంగా బాలాజీ మాట్లాడుతూ.. ఇటీవల విజయవాడ ధర్నా చౌక్ వద్ద నిర్వహించిన నిరసన దీక్షల సందర్భంగా ప్రభుత్వం ఇచ్చిన హామీలను వెంటనే అమలు చేయాలని కోరారు. కాయకష్టం చేసి దాచుకున్న సొమ్మును అగ్రిగోల్డ్ యాజమాన్యం కాజేయడంతో బాధితులు రోడ్డున పడ్డారని ఆవేదన వ్యక్తం చేశారు. గత 11 ఏళ్లుగా ప్రభుత్వాలు మారుతున్నా, తమ సమస్యలు మాత్రం పరిష్కారం కావడం లేదని ఆయన విమర్శించారు.
ప్రధాన డిమాండ్లు:
- బాధితుల సమస్యల పరిష్కారం కోసం తక్షణమే ప్రత్యేక ఫాస్ట్ ట్రాక్ కోర్టును ఏర్పాటు చేయాలి.
- అగ్రిగోల్డ్ ఆస్తులను వెంటనే అటాచ్ చేసి, వేలం ద్వారా వచ్చిన సొమ్మును కంపెనీ డేటా ప్రకారం బాధితులకు చెల్లించాలి.
ఈ కార్యక్రమంలో అసోసియేషన్ నాయకులు షేక్ ఖాదర్, కె. లక్ష్మణ్, రామ్మోహన్ రావు, సహదేవుడు, పి. శ్రీనివాసరావు, వి. సోమశేఖర్ తదితరులు పాల్గొని తమ మద్దతు తెలిపారు.GUNTUR NEWS
Author
