బాపట్ల, మార్చి 05: సాంకేతిక రంగంలో వస్తున్న విప్లవాత్మక మార్పులు, ఏఐ (AI) మరియు క్వాంటం టెక్నాలజీపై బాపట్ల ఇంజినీరింగ్ కళాశాల (BEC) అంతర్జాతీయ వేదికగా మారనుంది. కళాశాల కెమిస్ట్రీ విభాగం ఆధ్వర్యంలో మార్చి 23 నుండి 25 వరకు నిర్వహించనున్న మూడు రోజుల అంతర్జాతీయ సదస్సు బ్రోచర్ను బాపట్ల ఎడ్యుకేషన్ సొసైటీ అధ్యక్షులు శ్రీ ముప్పలనేని శ్రీనివాసరావు గురువారం ఆవిష్కరించారు.
సదస్సు ప్రధానాంశం:
“బయో-డిజిటల్ ఆల్కెమీ: గ్లోబల్ ఇన్నోవేషన్స్ ఇన్ ఏఐ–క్వాంటం ఎనేబుల్డ్ ట్రాన్స్ఫార్మేషన్ ఆఫ్ నెక్స్ట్-జెనరేషన్ స్మార్ట్ మెటీరియల్స్ అండ్ లైఫ్ సైన్సెస్” అనే కీలక అంశంపై ఈ సదస్సు జరగనుంది.
పరిశోధనలకు సరికొత్త వేదిక:
బ్రోచర్ ఆవిష్కరణ అనంతరం ముప్పలనేని శ్రీనివాసరావు మాట్లాడుతూ.. ఆధునిక ప్రపంచంలో కీలకమైన ఆర్టిఫిషియల్ ఇంటెలిజెన్స్, క్వాంటం టెక్నాలజీ, స్మార్ట్ మెటీరియల్స్ వంటి రంగాల్లో జరుగుతున్న తాజా పరిశోధనలను చర్చించేందుకు ఈ సదస్సు ఒక గొప్ప వేదిక అని పేర్కొన్నారు. ఈ కార్యక్రమంలో సొసైటీ కార్యదర్శి శ్రీ మానం నాగేశ్వరరావు, జాయింట్ సెక్రటరీ శ్రీ దొడ్డపనేని వెంకయ్య చౌదరి పాల్గొని సదస్సు విజయవంతం కావాలని ఆకాంక్షించారు.
హైబ్రిడ్ విధానంలో నిర్వహణ:
కళాశాల ప్రిన్సిపాల్ ప్రొఫెసర్ డా. బి. శ్రీనివాసరావు మాట్లాడుతూ.. ఈ సదస్సును ప్రత్యక్షంగా మరియు ఆన్లైన్ (హైబ్రిడ్) విధానంలో నిర్వహిస్తున్నట్లు తెలిపారు. దీనివల్ల విద్యార్థులు, పరిశోధకులకు అంతర్జాతీయ స్థాయి శాస్త్రవేత్తలతో సంభాషించే అవకాశం లభిస్తుందన్నారు. దేశ విదేశాల నుంచి ప్రముఖ పరిశోధకులు, పారిశ్రామిక ప్రతినిధులు ఈ కార్యక్రమంలో పాల్గొని తమ పరిశోధనా పత్రాలను సమర్పించనున్నారని నిర్వాహకులు వెల్లడించారు.
పాల్గొన్న ప్రముఖులు:
ఈ కార్యక్రమంలో సదస్సు కన్వీనర్ డా. చెన్నంశెట్టి సుబ్రహ్మణ్యం, కో-కన్వీనర్ డా. వి. మాధవరావు, ఆర్గనైజింగ్ సెక్రటరీ డా. కె. ప్రసాదరావుతో పాటు రసాయన శాస్త్ర విభాగాధిపతులు, అధ్యాపకులు మరియు విద్యార్థులు పాల్గొన్నారు.bapatla news
Author
