ఆంధ్రప్రదేశ్‌లో ఇంజినీరింగ్, ఫార్మసీ కోర్సుల్లో అడ్మిషన్ కోసం ఎదురుచూస్తున్న విద్యార్థులకు కీలక అప్డేట్ వచ్చింది. రాష్ట్ర వ్యాప్తంగా ఉన్న ప్రభుత్వ, ప్రైవేట్ ఇంజినీరింగ్ కాలేజీల్లో 2025-26 విద్యా సంవత్సరానికి గాను ఈఏపీసెట్ (EAPCET) కౌన్సెలింగ్ షెడ్యూల్‌ను ఉన్నత విద్యామండలి విడుదల చేసింది. ఇప్పటికే తెలంగాణలో కౌన్సెలింగ్ ప్రక్రియ మొదలైనందున, అదే రీతిలో ఏపీలో కూడా అడ్మిషన్ ప్రక్రియ త్వరగా పూర్తి చేయడానికి షెడ్యూల్‌లో మార్పులు చేసినట్టు సెట్ కన్వీనర్ గణేష్ కుమార్ తెలిపారు.
తాజాగా విడుదల చేసిన షెడ్యూల్ ప్రకారం జూలై 7 నుంచి కౌన్సెలింగ్ ప్రక్రియ ప్రారంభం కానుంది. ముందుగా జూలై 17 నుంచి మొదలు పెట్టాలని అధికారులు నిర్ణయించారు. అయితే, తెలంగాణ కౌన్సెలింగ్‌ను దృష్టిలో ఉంచుకుని, ఏపీలో కూడా సమాంతరంగా పూర్తిచేయడానికి షెడ్యూల్‌ను ముందుకు మార్చారు. మొత్తం మూడు విడతల్లో ఈఏపీసెట్ కౌన్సెలింగ్ నిర్వహించనున్నారు.
కీలక తేదీలు ఇలా ఉన్నాయి:
🔸 జూలై 5: సవరించిన కౌన్సెలింగ్ ప్రకటన విడుదల
🔸 జూలై 7-16: రిజిస్ట్రేషన్, ప్రాసెసింగ్ ఫీజు చెల్లింపు
🔸 జూలై 10-18: వెబ్ ఆప్షన్స్ నమోదు కోసం అవకాశం
🔸 జూలై 19: వెబ్ ఆప్షన్స్ మార్చుకునే అవకాశం
🔸 జూలై 22: సీట్లు కేటాయింపు
🔸 జూలై 23-26: సీట్లు పొందిన విద్యార్థులు కాలేజీల్లో రిపోర్టు చేయాలి
🔸 ఆగస్టు 4: ఇంజినీరింగ్ తరగతులు ప్రారంభం
ఈ ఏడాది ఈఏపీసెట్ ఇంజినీరింగ్ విభాగంలో 1,89,748 మంది విద్యార్థులు అర్హత సాధించిన విషయం తెలిసిందే. వీరందరికీ సీట్లు కేటాయించడానికి చర్యలు తీసుకుంటున్నామని అధికారులు స్పష్టంచేశారు. విద్యార్థులు eapcet-sche.aptonline.in లేదా sche.ap.gov.in వెబ్‌సైట్‌లో ఈ ప్రక్రియకు సంబంధించిన అప్డేట్స్ ను తనిఖీ చేస్తూ ఉండాలని సూచించారు.
కౌన్సెలింగ్‌కి అవసరమయ్యే ముఖ్య డాక్యుమెంట్లు:
✅ ఈఏపీసెట్ ర్యాంక్ కార్డ్, హాల్ టికెట్
✅ ఇంటర్ లేదా తత్సమాన సర్టిఫికెట్
✅ ట్రాన్స్‌ఫర్ సర్టిఫికెట్ (TC)
✅ కాస్ట్ సర్టిఫికెట్ (ఒకవేళ రిజర్వేషన్ అవసరమైతే)
✅ ఆదార్ కార్డ్ కాపీ
✅ 10th మెమో
✅ రెసిడెన్స్ సర్టిఫికెట్
✅ ఇన్‌కమ్ సర్టిఫికెట్
వీటిని సకాలంలో సిద్దం చేసుకుని సీట్ల కోసం వెబ్ ఆప్షన్స్ వేసుకునే ముందు వాటిని జాగ్రత్తగా చెక్ చేసుకోవాలి.
సీట్లు ఎలా కేటాయిస్తారు?
విద్యార్థులు ఇచ్చే వెబ్ ఆప్షన్స్, ర్యాంక్, రిజర్వేషన్లు, సీట్ల లభ్యత ఆధారంగా సీట్లు కేటాయిస్తారు. కౌన్సెలింగ్ చివరగా సీట్లు పొందిన విద్యార్థులు ఆయా కాలేజీల్లో రిపోర్ట్ చేసి, ఆగస్టు 4 నుంచి తరగతులు ప్రారంభించవచ్చు.
Authors
