బాపట్ల, సెప్టెంబర్ 21:
సూర్యలంకలో సెప్టెంబర్ 26 నుండి 28 వరకు జరగనున్న బీచ్ ఫెస్టివల్కి ప్రజలు విస్తృతంగా హాజరయ్యేలా సమగ్రమైన ప్రచార ప్రణాళికలు రూపొందించాలని బాపట్ల జిల్లా కలెక్టర్ డా. వి. వినోద్ కుమార్ ఆదేశించారు. ఆదివారం స్థానిక కలెక్టరేట్లోని మినీ వీక్షణా సమావేశ మందిరంలో టూరిజం శాఖ అధికారులతో సమీక్ష నిర్వహించిన ఆయన, వివిధ సామాజిక మాధ్యమాల ద్వారా ఫెస్టివల్ను ప్రజల్లోకి తీసుకెళ్లేలా కార్యాచరణను రూపొందించాలని సూచించారు.
ఇన్స్టాగ్రామ్, ట్విట్టర్, యూట్యూబ్ వేదికలపై ఆకర్షణీయమైన విధంగా ప్రచారం చేయాలని కలెక్టర్ ఆదేశించారు. బీచ్ అందాలను, ఫెస్టివల్ లో జరిగే ప్రధాన కార్యక్రమాలను ప్రజలకు పరిచయం చేయాల్సిన అవసరం ఉందని పేర్కొన్నారు. ఒక నిమిషం లోపు ఉండే వీడియోల రూపంలో ప్రచారాన్ని రూపొందించాలన్నారు. వీటిని సాధ్యమైనంతగా షార్ట్ ఫార్మాట్లో రూపొందించి, అందరికీ సులభంగా వీక్షించదగినట్లుగా సామాజిక మాధ్యమాల్లో అప్లోడ్ చేయాలని సూచించారు.
ప్రజలలో ఆసక్తిని పెంచేలా హోర్డింగ్స్, స్టిక్కర్లు, కరపత్రాలు
విజయవాడ, విశాఖపట్నం, తిరుపతి, హైదరాబాద్ వంటి ప్రధాన నగరాలతో పాటు రాష్ట్రంలోని అన్ని పట్టణాల్లో హోర్డింగ్స్ ఏర్పాటు చేయాలని కలెక్టర్ సూచించారు. అలాగే ఆర్టీసీ బస్టాండ్లు, రైల్వే స్టేషన్లు, బస్సులు, ఆటోలు, రైళ్లపై ప్రచార స్టిక్కర్లు అంటించేందుకు చర్యలు తీసుకోవాలన్నారు. కరపత్రాలు ముద్రించి విస్తృతంగా పంపిణీ చేయాలని అధికారులకు ఆదేశించారు.
సినిమా థియేటర్లు, రేడియో మాధ్యమాల వాడకం ద్వారా ప్రచారం
స్థానిక మీడియా, సినిమా థియేటర్లలో ఇంటర్వల్స్ సమయంలో ప్రకటనలు, రేడియో మిర్చి వంటి ప్లాట్ఫాంలలో ప్రకటనల ద్వారా ప్రజల్లో ఆసక్తి కలిగించేలా చేయాలని కలెక్టర్ పేర్కొన్నారు.
సురక్షిత, శ్రమనిర్వహణాత్మక ఏర్పాట్లు
సూర్యలంక బీచ్ వద్ద జరుగనున్న ఫెస్టివల్కు సంబంధించిన ఏర్పాట్లపై కూడా కలెక్టర్ సమీక్ష నిర్వహించారు. డయాస్, ప్రముఖుల కోసం ప్రత్యేక సీట్లు, వీక్షకుల కోసం కుర్చీలు, స్టాల్స్, హెల్ప్ డెస్క్, కంట్రోల్ రూమ్ వంటి ఏర్పాట్లపై అధికారులకు దిశానిర్దేశం చేశారు. ముఖ్యమంత్రి, సీఎంఓ అధికారులు, ప్రముఖులు, మీడియా ప్రతినిధుల కోసం వేర్వేరు గ్రీన్ రూమ్లు, పాస్లు ఏర్పాటు చేయాలని సూచించారు.
హరిత రిసార్ట్ను ఆకర్షణీయంగా తీర్చిదిద్దాలి
హరిత రిసార్ట్ మేనేజర్కు కూడా కలెక్టర్ పలు సూచనలు చేశారు. రిసార్ట్ను స్వచ్ఛంగా, సుందరంగా తీర్చిదిద్దాలన్నారు. ఫెస్టివల్ ముగిసేంతవరకు అందులోని గదులను అందుబాటులో ఉంచాలని సూచించారు.
ఈ సమావేశంలో టూరిజం అథారిటీ సీఎంఓ పద్మారాణి, టూరిజం డెవలప్మెంట్ కార్పొరేషన్ ఎస్.ఈ ఈశ్వరయ్య, ఇతర టూరిజం అధికారులు పాల్గొన్నారు.
Author
