కృష్ణా జిల్లా మచిలీపట్నంలో చిన్న వయసులోనే జూదానికి, క్రికెట్ బెట్టింగ్‌కు బానిసలై, డబ్బు కోసం దొంగతనాలకు పాల్పడుతున్న ముగ్గురు తొమ్మిదో తరగతి విద్యార్థులను పోలీసులు అదుపులోకి తీసుకున్నారు. ఈ ఘటన జిల్లాలో కలకలం రేపుతోంది. చిన్న వయసులోనే ఇంతటి అపరాధాలకు అడుగుపెడుతున్న విద్యార్థుల వ్యవహారం పలు ప్రశ్నలను లేవనెత్తుతోంది.
ఈ కేసు వివరాలను మచిలీపట్నం డిఎస్పి చప్పిడి రాజా మంగళవారం మీడియాతో వెల్లడించారు. చిన్నారులు కావాల్సిన చోట చదువుతో ఉన్నతంగా ఎదగాల్సిన సమయంలో జూదం, బెట్టింగ్ వంటి భ్రష్టుపట్టిన మార్గాల్లోకి వెళ్లడం కలవరపెడుతోందని ఆయన ఆవేదన వ్యక్తం చేశారు.
పోలీసుల చెబుతోంటే… ఈ ముగ్గురు విద్యార్థులు మొబైల్ ఫోన్ల ద్వారా క్రికెట్ బెట్టింగ్, ఆన్‌లైన్ గేమ్స్‌కు బానిసలైయ్యారు. మొదట్లో అలవాటు కోసం తల్లిదండ్రుల జేబులోనుండి డబ్బు దొంగిలించేవారు. ఆపై నిదానంగా ఊరిలోని ఖాళీ ఇళ్లను ఎంచుకుని చోరీలు చేయడం ప్రారంభించారు. తీరా చివరకు వరుస దొంగతనాలతో లక్షలాది రూపాయల విలువ చేసే బంగారం, వెండి సామాన్లు అపహరించారు.
పోలీసుల విచారణలో షాకింగ్ విషయాలు వెలుగులోకి వచ్చాయి. బాలురు ఇప్పటికే మచిలీపట్నంలోని వివిధ కాలనీల్లో ఐదు వరకు చోరీల‌కు పాల్పడినట్టు పోలీసులు గుర్తించారు. ఇంటి యజమానులు ఫిర్యాదు చేసిన నేపథ్యంలో క్లూస్‌ టీమ్‌తో పాటు సీసీ కెమెరా ఆధారంగా పోలీసులు విచారణ చేపట్టారు. విచారణలో చిన్నారుల హస్తం ఉన్నట్లు నిర్ధారణ అయింది. వెంటనే వారిని అదుపులోకి తీసుకుని కౌన్సిలింగ్ ఇచ్చినట్లు పోలీసులు వెల్లడించారు.
డిఎస్పి చప్పిడి రాజా మాట్లాడుతూ, ఈ ముగ్గురు బాలుర దగ్గర నుంచి దాదాపు రూ. 10 లక్షల విలువ చేసే బంగారు ఆభరణాలు, వెండి వస్తువులు స్వాధీనం చేసుకున్నామని తెలిపారు. అలాగే వారి వద్ద నుంచి మూడు స్మార్ట్‌ఫోన్లు, కొన్ని బెట్టింగ్ యాప్స్ ఉన్న లాప్టాప్, చోరీ చేసిన నగదు కూడా సీజ్ చేసినట్లు పేర్కొన్నారు. పోలీసులు వారి తల్లిదండ్రులను పిలిపించి కౌన్సిలింగ్ ఇచ్చారు. అలాగే బాలురపై జ్యూవెనైల్ చట్టం ప్రకారం కేసులు నమోదు చేసి చైల్డ్ వెల్ఫేర్ కమిటీకి హాజరు పరిచినట్లు తెలిపారు.
Authors
