ఏలూరు రూరల్ మండలంలోని చాటపర్రు గ్రామంలో పలు అభివృద్ధి కార్యక్రమాలకు శ్రీకారం చుట్టినట్లు పంచాయతీ కార్యదర్శి పి. శ్రీనివాస వర్మ తెలిపారు. దెందులూరు ఎమ్మెల్యే చింతమనేని ప్రభాకర్ సహకారంతో ఈ గ్రామంలో అవసరమైన మౌలిక వసతులు మెరుగుపర్చే లక్ష్యంతో నిధులను సమీకరించి అభివృద్ధి పనులు వేగంగా చేపడుతున్నట్లు ఆయన చెప్పారు.
మహాత్మా గాంధీ జాతీయ ఉపాధి హామీ పథకం కింద పలు ప్రధాన రహదారి నిర్మాణాలు, కాలనీలకు కనెక్టివిటీ కల్పించే రోడ్లు, బీజు సమస్యల పరిష్కారానికి చర్యలు తీసుకుంటున్నామని ఆయన తెలిపారు. మీడియాతో మాట్లాడుతున్న సందర్భంలో శ్రీనివాస వర్మ మాట్లాడుతూ, “మేము పల్లె పండుగలో భాగంగా కాపులపేటలో 5 లక్షల రూపాయలతో సిసి రోడ్డు నిర్మాణం పూర్తిచేశాం. అదేవిధంగా రెండు లక్షల రూపాయలతో మెటల్ రోడ్డు కూడా ఏర్పాటు చేశాం. యాదవులపేటలో సిసి టు బిటి రోడ్డు కోసం 1.40 లక్షల రూపాయల నిధులు ఖర్చు చేయగా, గీతా కాలనీలో 6 లక్షల రూపాయలతో సిసి రోడ్డు నిర్మించాం” అని వివరించారు.
ఇది మాత్రమే కాదు, గ్రామ శివారు తిమ్మారావుగూడెం లో కూడా అభివృద్ధి పనులకు పెద్ద ఎత్తున నిధులు మంజూరైనట్లు చెప్పారు. జిల్లా పరిషత్ నుండి మొత్తం 40 లక్షల రూపాయలు మంజూరు అయ్యాయని, ఈ నిధులతో చంద్రబాబు నాయుడు కాలనీ, తిమ్మారావుగూడెం ప్రాంతాల్లో రెండు సిసి రోడ్లు, రెండు మెటల్ రోడ్లు నిర్మిస్తామన్నారు. ఇప్పటికే టెండర్ల ప్రక్రియ పూర్తయిందని, త్వరలోనే నిర్మాణ పనులు ప్రారంభమవుతాయని తెలిపారు.
తిమ్మారావుగూడెంలో ఉన్న మంచినీటి సమస్య కు శాశ్వత పరిష్కారం అందించేందుకు ప్రత్యేక చర్యలు చేపట్టినట్లు కార్యదర్శి తెలిపారు. “ప్రస్తుతం తిమ్మారావుగూడెంలో పెద్దగా నీటి సమస్య లేదు. కానీ భవిష్యత్తులో సమస్యలు రాకుండా చూడటం కోసం CPW స్కీమ్ ద్వారా జిల్లా పరిషత్‌కి ప్రతిపాదనలు పంపాం. ఇవి ఆమోదం పొందిన తర్వాత పూర్తిస్థాయిలో శుద్ధ మంచినీటి సరఫరా అందించగలం” అని చెప్పారు.
పంచాయతీ సాధారణ నిధుల నుంచి కూడా గ్రామానికి మద్దతు అందించడంలో ఏమాత్రం వెనుకాడటం లేదని తెలిపారు. తిమ్మారావుగూడెంలో రెండు కల్వర్టులు నిర్మించేందుకు రెండు లక్షల రూపాయలు వెచ్చించామని, ప్రస్తుతం వాటి నిర్మాణం పూర్తయిందని తెలిపారు.
గ్రామ పరిశుభ్రత కూడా అత్యంత ప్రాధాన్యంగా తీసుకుంటున్నట్లు కార్యదర్శి స్పష్టంచేశారు. ప్రతిరోజూ ఇంటింటికి చెత్త సేకరణ, పరిశుభ్రత కార్యక్రమాలను పరిశీలించి, ఏ సమస్యలు ఉన్నా వెంటనే పరిష్కరించే విధంగా గ్రామ సిబ్బందిని సమన్వయం చేస్తున్నట్లు వివరించారు.
గ్రామానికి మరింత అభివృద్ధి కోసం ప్రజలు కూడా సహకరించాలని పి. శ్రీనివాస వర్మ పిలుపునిచ్చారు. “రాష్ట్ర ప్రభుత్వ పథకాలని గ్రామస్థులు సద్వినియోగం చేసుకుని అభివృద్ధిలో భాగస్వాములవ్వాలి” అన్నారు. ప్రజలకు సకాలంలో అన్ని సేవలు అందించే విధంగా పంచాయతీ కార్యాలయం నిరంతరం అందుబాటులో ఉంటుందని తెలిపారు.
ఈ అభివృద్ధి కార్యక్రమాలు చేపడుతూ చాటపర్రు గ్రామాన్ని మోడల్ గ్రామంగా తీర్చిదిద్దే లక్ష్యంతో ముందుకు వెళ్తున్నట్లు పేర్కొన్నారు. ప్రత్యేకించి తిమ్మారావుగూడెం వాసులకి నిరంతరం శుద్ధ మంచినీటి సరఫరా, రోడ్లు, డ్రైనేజ్ వసతులు, రహదారి కల్వర్టులు వంటి మౌలిక వసతుల కల్పనలో మరింత పటిష్టంగా వ్యవహరిస్తామని హామీ ఇచ్చారు.
చివరగా పంచాయతీ కార్యదర్శి మాట్లాడుతూ, “దెందులూరు ఎమ్మెల్యే చింతమనేని ప్రభాకర్ గారి సూచనల మేరకు ఈ అభివృద్ధి కార్యక్రమాలు నాణ్యతకు ఎలాంటి లోటు లేకుండా వేగంగా పూర్తిచేస్తాం. రాబోయే రోజుల్లో మరిన్ని నూతన పథకాలను గ్రామానికి తీసుకొచ్చి ప్రతి ఇంటి వద్దకు మౌలిక వసతులను అందిస్తాం” అని చెప్పారు.
గ్రామస్థులు కూడా ఈ అభివృద్ధి పనులను చూసి సంతృప్తి వ్యక్తం చేస్తున్నారు. తమ గ్రామానికి మంచి రోజులు రాబోతున్నాయని, ఇంకేమీ సమస్యలు ఉండకూడదని ఆశాభావం వ్యక్తం చేస్తున్నారు.
Authors
