అమరావతి: ఆంధ్రప్రదేశ్ రాష్ట్రంలోని దివ్యాంగుల బ్యాక్లాగ్ పోస్టుల భర్తీ ప్రక్రియలో జిల్లా అధికారుల నిర్లక్ష్యంపై నిరసన వ్యక్తమవుతోంది. ఈ మేరకు మంగళవారం అమరావతి సచివాలయంలో రాష్ట్ర దివ్యాంగుల సంక్షేమ శాఖ మంత్రి డోలా బాల వీరాంజనేయ స్వామి గారిని నవ్యాంధ్ర వికలాంగుల హక్కుల సేవా సమితి ప్రతినిధులు కలిశారు.
రోస్టర్ వెరిఫికేషన్లో అంతులేని జాప్యం
బ్యాక్లాగ్ పోస్టుల నోటిఫికేషన్ విడుదల తేదీ సమీపిస్తున్నప్పటికీ, పలు జిల్లాల్లో రోస్టర్ వెరిఫికేషన్ ప్రక్రియ నత్తనడకన సాగుతోందని సమితి రాష్ట్ర అధ్యక్షులు షేక్ కాలేషా మంత్రి దృష్టికి తీసుకెళ్లారు. ముఖ్యంగా:
- ఉమ్మడి కృష్ణా జిల్లా
- ఉమ్మడి గుంటూరు జిల్లా
- నెల్లూరు జిల్లా మరియు ఇతర జిల్లాల్లో ఈ ప్రక్రియ ఇంకా పూర్తి కాలేదని ఆయన ఆవేదన వ్యక్తం చేశారు.
అధికారుల నిర్లక్ష్యమే కారణం?
ప్రభుత్వం మూడేళ్ల సుదీర్ఘ నిరీక్షణ తర్వాత జీ.వో. ఎం.ఎస్. నెంబర్ 15 (తేదీ: 14/11/2025) ద్వారా నోటిఫికేషన్ విడుదల చేసినప్పటికీ, క్షేత్రస్థాయిలో అసిస్టెంట్ డైరెక్టర్ల నిర్లక్ష్యం వల్ల అడుగు ముందుకు పడటం లేదని కాలేషా విమర్శించారు. రోస్టర్ పాయింట్ల ఖరారులో జరుగుతున్న ఆలస్యాన్ని ఇతర ప్రభుత్వ శాఖల మీదకు నెట్టేస్తూ అధికారులు కాలయాపన చేస్తున్నారని ఆయన ఆరోపించారు.Amaravathi News
“నోటిఫికేషన్ వచ్చి నెలలు గడుస్తున్నా అధికారులు స్పందించకపోవడం వల్ల అర్హులైన వేలాది మంది దివ్యాంగులు నష్టపోయే ప్రమాదం ఉంది. కొన్ని జిల్లాల్లో అభ్యర్థులు తీవ్ర ఆందోళనలో ఉన్నారు. వెంటనే ఉన్నతాధికారులు జోక్యం చేసుకుని ప్రక్రియను వేగవంతం చేయాలి.” — షేక్ కాలేషా, రాష్ట్ర అధ్యక్షులు
మంత్రి హామీ
దివ్యాంగుల సమస్యలను సావధానంగా విన్న మంత్రి బాల వీరాంజనేయ స్వామి, సంబంధిత అధికారులతో మాట్లాడి రోస్టర్ వెరిఫికేషన్ ప్రక్రియ త్వరితగతిన పూర్తయ్యేలా చూస్తామని హామీ ఇచ్చారు. ఈ కార్యక్రమంలో గుంటుపల్లి సతీష్, ఏ. లక్ష్మి, అభిరామ్ కృష్ణ తదితర ప్రతినిధులు పాల్గొన్నారు.
Author
