వెలగపూడి, అమరావతి: ఆంధ్రప్రదేశ్ రాష్ట్రంలోని దివ్యాంగుల సంక్షేమమే ధ్యేయంగా కూటమి ప్రభుత్వం కీలక నిర్ణయం తీసుకుంది. దివ్యాంగుల చిరకాల వాంఛ అయిన ఉచిత బస్సు ప్రయాణ సౌకర్యాన్ని కల్పిస్తూ ముఖ్యమంత్రి నారా చంద్రబాబు నాయుడు, ఉపముఖ్యమంత్రి కొణిదల పవన్ కళ్యాణ్ నిర్ణయం తీసుకున్నారు. ఈ పథకానికి ‘ఇంద్రధనస్సు’ గా నామకరణం చేసి, ఈ నెల 18వ తేదీన అధికారికంగా ప్రారంభించనున్నారు.
ముఖ్యమంత్రితో భేటీ – ధన్యవాదాల సమర్పణ
నిన్న (05-02-2026) రాత్రి 8 గంటల సమయంలో వెలగపూడి సచివాలయంలో ముఖ్యమంత్రి చంద్రబాబు నాయుడును దివ్యాంగుల కార్పొరేషన్ చైర్మన్ గడుపుడి నారాయణస్వామి, జనసేన పార్టీ దివ్యాంగుల జనసైనికుడు గోగన ఆదిశేషు మరియు పలు దివ్యాంగుల సంఘాల నాయకులు కలిశారు. గతంలో నవంబర్ 8న సీఎంకు, డిసెంబర్ 3న డిప్యూటీ సీఎం పవన్ కళ్యాణ్ గారికి వినతిపత్రాలు సమర్పించిన నేపథ్యంలో, ప్రభుత్వం సానుకూలంగా స్పందించి పథకాన్ని ప్రారంభించడం పట్ల వారు హర్షం వ్యక్తం చేశారు.
పథకం ముఖ్యాంశాలు:
- పేరు: ఇంద్రధనస్సు ఉచిత బస్సు పథకం.
- ప్రారంభం: ఫిబ్రవరి 18, 2026.
- ప్రయోజనం: రాష్ట్రవ్యాప్తంగా ఉన్న దివ్యాంగులందరికీ ఉచిత ప్రయాణ సౌకర్యం.
నేతల హర్షం:
ఈ సందర్భంగా గడుపుడి నారాయణస్వామి మరియు గోగన ఆదిశేషు మాట్లాడుతూ.. దివ్యాంగుల సమస్యలపై తమ విన్నపాన్ని మన్నించి, త్వరితగతిన ఉచిత బస్సు పథకాన్ని అమలు చేస్తున్నందుకు ముఖ్యమంత్రికి, ఉపముఖ్యమంత్రికి రాష్ట్రంలోని దివ్యాంగులందరి తరపున ప్రత్యేక కృతజ్ఞతలు తెలియజేశారు. “దివ్యాంగుల పట్ల ప్రభుత్వం చూపుతున్న ఆదరణ అభినందనీయమని” వారు పేర్కొన్నారు.GUNTUR NEWS
Author
