గుడివాడలో భారీ రుణాల కుంభకోణం – మెప్మా, బ్యాంకు సిబ్బంది పై కేసు నమోదు

గుడివాడ, అక్టోబర్ 10:గుడివాడ పట్టణంలో స్వయం సహాయక సంఘాల (డ్వాక్రా గ్రూపులు) పేరుతో పెద్ద ఎత్తున అక్రమ రుణాల మంజూరుకు సంబంధించి భారీ కుంభకోణం వెలుగులోకి వచ్చింది. డ్వాక్రా సభ్యులుగా నకిలీ గ్రూపులు ఏర్పాటు చేసి, పదే పదే రుణాలు పొందిన ఈ వ్యవహారంపై విజయవాడలోని బ్యాంకుల పరిశోధన విభాగం అధికారుల ఫిర్యాదుతో గుడివాడ టూటౌన్ పోలీసులు కేసులు నమోదు చేశారు.

పోలీసుల కథనం ప్రకారం – పట్టణంలోని దాదాపు 660 మంది మహిళలు ఒక్కసారిగా కాకుండా, నకిలీ సంఘాల ద్వారా రెండోసారి, మూడోసారి రుణాలు తీసుకున్నారు. మొత్తం రూ.5.77 కోట్లు రుణాలు మంజూరయ్యాయని తెలిసింది. చట్టపరంగా ఒక మహిళ ఒక్క గ్రూపులో మాత్రమే సభ్యురాలిగా ఉండాల్సిన నియమాన్ని ఉల్లంఘిస్తూ, అదే వ్యక్తులు పలు గ్రూపుల్లో సభ్యత్వాలు పొందినట్లు అధికారులు గుర్తించారు.

ఈ వ్యవహారంలో ఆర్టీపీలు పిల్లా శిరీష, ఇతర పదిమంది, మెప్మా సీసీలు రాజేంద్ర, సుజాతలపై వివిధ రకాల నకిలీ ధ్రువపత్రాలు సమర్పించినట్లు ఆరోపణలు ఉన్నాయి. దీనికి తోడు, సంబంధిత బ్యాంకు అధికారులు కూడా రుణాల మంజూరుకు అడ్డంకులు లేకుండా సహకరించినట్లు అనుమానాలు వెల్లడి అయ్యాయి.

విజయవాడ బ్యాంకు పరిశోధన విభాగం విచారణ అనంతరం గుడివాడ పోలీసులకు అధికారికంగా ఫిర్యాదు చేయగా, టూటౌన్ పోలీసులు కేసులు నమోదు చేసి దర్యాప్తు ప్రారంభించారు. ఇప్పటివరకు తీసుకున్న రుణాల్లో రూ.3 కోట్లు repay చేయగా, ఇంకా వడ్డీతో కలిపి సుమారు రూ.3.5 కోట్లు బకాయి ఉన్నట్లు సమాచారం.

ఈ అక్రమ రుణాల వ్యవహారం కేవలం గుడివాడకే పరిమితం కాకుండా, చుట్టుపక్కల ప్రాంతాల్లోనూ ఇలాంటి చీకటి వ్య‌వ‌హారాలు సాగుతున్నాయన్న అనుమానాలు వ్యక్తమవుతున్నాయి. కమీషన్ల కోసం కొందరు మహిళలు రెండు మూడు సంఘాల్లో సభ్యులుగా ఉండి, బ్యాంకులను మోసం చేసినట్లు సమాచారం. పోలీసులు మరింత లోతుగా దర్యాప్తు చేపట్టనున్నారు.