మన పూర్వీకులు శతాబ్దాలుగా ఇంట్లో కొన్ని ముఖ్యమైన ఔషధ మొక్కలను పెంచుతూ ఆరోగ్యాన్ని, అందాన్ని కాపాడుకున్నారు. ఈ మొక్కలు కేవలం అందాన్ని పెంచడమే కాదు, అనేక ఆరోగ్య సమస్యలకు సహజ పరిష్కారాన్ని అందిస్తాయి. ఇంట్లో తేలికగా పెంచుకునే వీటి ప్రయోజనాలు ఎన్నో. ముఖ్యంగా ఆయుర్వేదంలో వీటి ప్రాధాన్యత ఎంతో ఉంది. ఇలాంటి ఆరోగ్య ప్రయోజనాలు కలిగించే కొన్ని ముఖ్యమైన ఔషధ మొక్కలు, వాటి ఉపయోగాలు గురించి తెలుసుకుందాం.
1. పుదీనా (Mint):
పుదీనా ఆకులు మసాలా వంటల్లో రుచి, సువాసన కోసం మాత్రమే కాదు; ఇవి జీర్ణక్రియను మెరుగుపరచడంలో, ఉబ్బరం తగ్గించడంలో సహాయపడతాయి. రోజూ కొన్ని పుదీనా ఆకులు ఆహారంలో భాగంగా తీసుకుంటే శరీరానికి తాజా భావన, మంచి ఆరోగ్య ప్రయోజనాలు లభిస్తాయి. టీ, సాస్, స్వీట్లు వంటి వాటిలో కూడా వాడతారు. పుదీనా వాసన మనసును ఉల్లాసంగా మార్చుతుంది.
2. కరివేపాకు (Curry Leaves):
ప్రతి తెలుగు ఇంట్లో వంటల్లో తప్పనిసరిగా వాడే కరివేపాకు ఆరోగ్యానికి అద్భుతమైన ఔషధం. ఇందులో క్యాల్షియం, మెగ్నీషియం, ఐరన్, ఫాస్ఫరస్, జింక్, పీచు, విటమిన్ C, B, E వంటి పోషకాలు అధికంగా ఉంటాయి. మధుమేహం నియంత్రణ, నాడీ సంబంధిత వ్యాధుల నివారణ, క్యాన్సర్ రిస్క్ తగ్గింపు వంటి అనేక ప్రయోజనాలు ఉన్నాయి. ఐరన్, యాంటీఆక్సిడెంట్లు పుష్కలంగా ఉండటం వల్ల రక్తహీనత నివారణకు, శరీర రోగనిరోధక శక్తి పెంపుకు ఉపయోగపడుతుంది.
3. లెమన్ గ్రాస్ (Lemongrass):
ఈ సువాసన మొక్కను టీ, సూప్, థాయ్ వంటల్లో ఎక్కువగా వాడతారు. లెమన్ గ్రాస్లో యాంటీబాక్టీరియల్, యాంటీ ఫంగల్ గుణాలు ఉంటాయి. ఇది శరీరాన్ని ఇన్ఫెక్షన్ల నుంచి రక్షిస్తుంది. ఇందులో యాంటీఆక్సిడెంట్లు అధికంగా ఉండి, రక్తంలోని బ్యాడ్ కొలెస్ట్రాల్ను తగ్గించడంలో సహాయపడతాయి. ఇమ్యూనిటీ వ్యవస్థను బలపరిచే గుణాలు కూడా ఉన్నాయి. వ్యాధులు, రోగాలతో పోరాడే శక్తిని ఇస్తుంది.
4. గిలోయ్/తిప్పతీగ (Giloy):
ఇది రోగనిరోధక శక్తిని పెంచే ఔషధ మొక్కగా ప్రసిద్ధి. గిలోయ్లో యాంటీ ఫంగల్, యాంటీ బ్యాక్టీరియల్, యాంటీ ఆక్సిడెంట్లు పుష్కలంగా ఉంటాయి. ఇది శరీర ఉష్ణోగ్రతను తగ్గించడంలో, ఇన్ఫెక్షన్లను నివారించడంలో సహాయపడుతుంది. రోజూ తిప్పతీగ ఆకులను తీసుకోవడం వల్ల రోగనిరోధక శక్తి పెరుగుతుంది. డయాబెటిస్ ఉన్నవారు గిలోయ్ చూర్ణాన్ని ఉదయం, సాయంత్రం తీసుకుంటే షుగర్ లెవెల్స్ నియంత్రణలో ఉంటాయి.
5. తులసి (Tulsi):
తులసి చెట్టు ప్రతి హిందూ ఇంట్లో మతపరంగా ప్రత్యేక స్థానం కలిగి ఉంది. కానీ దీని ఔషధ గుణాలు కూడా అపారంగా ఉన్నాయి. తులసి రోగనిరోధక శక్తిని పెంచుతుంది, దగ్గు, జలుబు వంటి సమస్యలకు ఉపశమనం ఇస్తుంది, జీర్ణక్రియను మెరుగుపరుస్తుంది. తులసి ఆకులను టీగా, లేదా నేరుగా తినడం వల్ల శరీరానికి పలు విధాలుగా మేలు జరుగుతుంది. తులసి వాసన కూడా ఇంట్లో శుభ్రతను, ప్రశాంత వాతావరణాన్ని కలిగిస్తుంది.
ఈ అయిదు మొక్కలు ఇంట్లో పెంచుకోవడం వల్ల ఆరోగ్యానికి, అందానికి సహజ రక్షణ లభిస్తుంది. వీటి సంరక్షణ తేలిక, ఉపయోగాలు అనేకం. ఇంట్లో ఈ మొక్కలను పెంచడం ద్వారా చిన్నపాటి ఆరోగ్య సమస్యలకు సహజ పరిష్కారం దొరుకుతుంది. అయితే, ఎలాంటి ఆరోగ్య సమస్యలకు వీటిని ఉపయోగించే ముందు వైద్య నిపుణుల సలహా తీసుకోవడం మంచిదని గుర్తుంచుకోవాలి.
Authors
