గుంటూరు, మార్చి 9:– అమరావతి ఔటర్ రింగ్ రోడ్డు (ORR) నిర్మాణంలో భూములు కోల్పోతున్న రైతులకు ప్రస్తుత ప్రైవేటు మార్కెట్ ధర ప్రకారం నష్టపరిహారం చెల్లించాలని రైతు సంఘం జిల్లా ఉపాధ్యక్షులు పాశం రామారావు డిమాండ్ చేశారు. తక్షణమే గ్రామ సభలు నిర్వహించి రైతుల అభిప్రాయాలను సేకరించాలని ఆయన ప్రభుత్వాన్ని కోరారు.
శుక్రవారం గుంటూరు జిల్లా కలెక్టర్ కార్యాలయం వద్ద ‘అమరావతి ఔటర్ రింగ్ రోడ్డు బాధితుల సమన్వయ కమిటీ’ ఆధ్వర్యంలో భారీ ధర్నా నిర్వహించారు. కౌలురైతు సంఘం జిల్లా అధ్యక్షులు బి. రామకృష్ణ అధ్యక్షతన జరిగిన ఈ నిరసనలో రైతులు తమ గోడును వెళ్లబోసుకున్నారు.
హడావుడి నోటిఫికేషన్లు సరికాదు
ఈ సందర్భంగా పాశం రామారావు మాట్లాడుతూ.. జిల్లాలోని 11 మండలాలు, 40 గ్రామాల్లో సుమారు 6 వేల ఎకరాల భూమిని సేకరించేందుకు జనవరి 5న నోటిఫికేషన్ ఇచ్చారని తెలిపారు. కేవలం 15 రోజుల వ్యవధి ఇచ్చి అభ్యంతరాలు తెలపాలనడం రైతులకు అన్యాయం చేయడమేనని విమర్శించారు.
- అదనపు సేకరణ: రోడ్డుకు 70 మీటర్ల వెడల్పు అవసరమైతే, ఏకంగా 250 మీటర్ల వెడల్పుతో భూములు సేకరించడం వెనుక మతలబు ఏంటని ప్రశ్నించారు.
- చట్ట విరుద్ధం: మూడు పంటలు పండే సారవంతమైన భూములను సేకరించడం 2013 భూసేకరణ చట్టానికి విరుద్ధమని ఆయన మండిపడ్డారు.
రిజిస్ట్రేషన్ విలువ కాదు.. మార్కెట్ విలువే ముఖ్యం
వ్యవసాయ కార్మిక సంఘం జిల్లా కార్యదర్శి ఈమని అప్పారావు మాట్లాడుతూ, ప్రస్తుతం సేకరిస్తున్న భూముల విలువ మార్కెట్లో ఎకరాకు రూ. 2 కోట్ల నుండి రూ. 10 కోట్ల వరకు ఉందన్నారు. కేవలం రిజిస్ట్రేషన్ విలువ ఆధారంగా నష్టపరిహారం ఇస్తామనడం సరికాదని, 2013 చట్టం ప్రకారం మార్కెట్ ధరకు 4 రెట్లు పరిహారం చెల్లించాలని డిమాండ్ చేశారు. భూమిపై ఆధారపడిన కౌలు రైతులు, వ్యవసాయ కార్మికులు, ఇళ్లు మరియు పశువుల పాకలు కోల్పోయే వారందరినీ ప్రభుత్వం ఆదుకోవాలన్నారు.Guntur Local News
జాయింట్ కలెక్టర్కు వినతిపత్రం
అనంతరం రైతు ప్రతినిధులు జాయింట్ కలెక్టర్ను కలిసి తమ డిమాండ్లతో కూడిన వినతిపత్రాన్ని సమర్పించారు. ఈ కార్యక్రమంలో రైతు సంఘం నేతలు ఎం. సాంబిరెడ్డి, ఎన్. భావన్నారాయణ, బిక్కి శ్రీనివాసరావు, కె. పద్మావతి, సౌజన్యతో పాటు సమన్వయ కమిటీ సభ్యులు శ్రీనివాసరెడ్డి, గుంటుపల్లి సాంబశివరావు తదితరులు పెద్ద సంఖ్యలో పాల్గొన్నారు. ప్రభుత్వం స్పందించకపోతే ఆందోళనను ఉధృతం చేస్తామని నాయకులు హెచ్చరించారు.
Author
