విశాఖపట్నం, జనవరి 20:– వైజాగ్–అనకాపల్లి–అరకు ప్రాంతాలను భారతదేశపు సమీకృత గ్లోబల్ కోస్టల్–హిల్ గ్రోత్ కారిడార్గా అభివృద్ధి చేయాలనే లక్ష్యంతో రాష్ట్ర ప్రభుత్వం ప్రతిష్టాత్మకంగా నిర్వహించనున్న **“విశాఖ ఉత్సవం”**కు సర్వం సిద్ధమైంది. ముఖ్యమంత్రి నారా చంద్రబాబు నాయుడు గారి దీర్ఘకాలిక అభివృద్ధి దార్శనికతకు అనుగుణంగా, ఆంధ్రప్రదేశ్ పర్యాటక శాఖ ఆధ్వర్యంలో ఈ ఉత్సవాన్ని నిర్వహిస్తున్నారు.
“సీ టు స్కై (Sea to Sky)” అనే వినూత్న కాన్సెప్ట్తో రూపొందించిన ఈ ఉత్సవం జనవరి 24 నుంచి ఫిబ్రవరి 1 వరకు తొమ్మిది రోజుల పాటు విశాఖపట్నం, అనకాపల్లి, అరకు ప్రాంతాల్లో బహుళ వేదికలపై జరగనుంది. దేశంలోనే అతిపెద్ద బీచ్ & తీరప్రాంత పండుగగా విశాఖ ఉత్సవం చరిత్ర సృష్టించనుందని అధికారులు తెలిపారు.
20 వేదికలు – 500కు పైగా కార్యక్రమాలు
ఉత్సవంలో 20 వేదికలపై 500కు పైగా ప్రత్యేక కార్యక్రమాలు నిర్వహించనున్నారు. 650 మందికి పైగా కళాకారులు పాల్గొనగా, 26 కిలోమీటర్ల తీరప్రాంతం ప్రధాన కేంద్రంగా వేడుకలు సాగనున్నాయి. వినోదం, సంస్కృతి, సాహస క్రీడలు, ఆహారం, సామాజిక భాగస్వామ్యం సమ్మేళనంగా ఈ ఉత్సవం రూపుదిద్దుకుంది.
భారీ ఆర్థిక ప్రభావం
ఈ ఉత్సవానికి 10 లక్షల మందికి పైగా సందర్శకులు వచ్చే అవకాశముందని అంచనా. దాదాపు 3,000 ప్రత్యక్ష ఉపాధి అవకాశాలు, మరో 1,800 మంది సహాయక సిబ్బందికి ఉద్యోగాలు కల్పించనున్నారు. స్థానిక ఆర్థిక వ్యవస్థపై సుమారు ₹500 కోట్లకు పైగా GDP ప్రభావం ఉంటుందని అధికారులు పేర్కొన్నారు.
ప్రధాన ఆకర్షణలు
సాహస క్రీడలు, బీచ్ వాలీబాల్, కబడ్డీ, బోటింగ్, హెలికాప్టర్ రైడ్స్, హాట్ ఎయిర్ బెలూన్ అనుభవాలు ప్రత్యేక ఆకర్షణగా నిలవనున్నాయి. పిల్లల కోసం పోటీలు, ముగ్గుల పోటీలు, వంటల పోటీలు, పాటలు–నృత్య కార్యక్రమాలు నిర్వహించనున్నారు. ధ్యాన శిబిరాలు, దేవాలయ జాతరలు, ఫుడ్ స్టాల్స్, ఫ్లీ మార్కెట్లు, బీచ్ షాక్స్ సందర్శకులను ఆకట్టుకోనున్నాయి.
విశాఖకు అంతర్జాతీయ గుర్తింపు
లోతైన సముద్ర ఓడరేవు, అంతర్జాతీయ విమానాశ్రయం, పారిశ్రామిక కారిడార్లు, నావికాదళ ఉనికి వంటి విశిష్టతలతో విశాఖపట్నం ఇప్పటికే వ్యూహాత్మక నగరంగా ఎదుగుతోందని అధికారులు తెలిపారు. విశాఖ ఉత్సవం ద్వారా నగరం గ్లోబల్ పెట్టుబడిదారులు, పర్యాటకులకు ఒక శక్తివంతమైన సంకేతాన్ని ఇస్తుందని పేర్కొన్నారు.
వేదికల వారీగా కార్యక్రమాలు
విశాఖపట్నంలో ఆర్.కె. బీచ్లో ప్రతిరోజూ సాయంత్రం లైవ్ కచేరీలు, డ్రోన్ షోలు నిర్వహించనున్నారు. MGM గ్రౌండ్స్లో ప్రారంభ వేడుకలు, పోటీలు, ఫ్లవర్ షో, కిడ్స్ జోన్లు, షాపింగ్ స్టాల్స్ ఏర్పాటు చేస్తున్నారు. రుషికొండ, భీమిలి, సాగర్ నగర్ బీచ్లలో సాహస క్రీడలు, సాంస్కృతిక కార్యక్రమాలు జరగనున్నాయి.
అనకాపల్లి జిల్లాలో ధ్యానం, వారసత్వ కార్యక్రమాలు, ఎకో టూరిజం వర్క్షాప్లు, స్టార్ కన్సర్ట్స్ నిర్వహించనున్నారు. అరకు లోయలో సైక్లింగ్ ట్రైల్స్, గిరిజన సంస్కృతి ప్రదర్శనలు, కాఫీ ఫెస్టివల్స్ ప్రత్యేక ఆకర్షణగా నిలవనున్నాయి.
సమన్వయ నాయకత్వంతో అభివృద్ధి
పర్యాటక రంగం ద్వారా ఆర్థిక వృద్ధి, ఉపాధి కల్పన సాధ్యమవుతుందని ముఖ్యమంత్రి నారా చంద్రబాబు నాయుడు గారు పేర్కొంటున్నారని అధికారులు తెలిపారు. ఉపముఖ్యమంత్రి పవన్ కళ్యాణ్ గారు ప్రజాకేంద్రీకృత అభివృద్ధిపై, ఐటీ మంత్రి నారా లోకేష్ గారు టెక్నాలజీ–లైఫ్ స్టైల్ హబ్గా వైజాగ్ అభివృద్ధిపై, పర్యాటక శాఖ మంత్రి కందుల దుర్గేష్ గారు గ్లోబల్ బ్రాండింగ్పై ప్రత్యేక దృష్టి సారిస్తున్నారని వెల్లడించారు.VISHAKAPATNAM.:లో నార లోకేష్ జన్మదిన వేడుకలు..
భద్రతా ఏర్పాట్లను హోం మంత్రి వంగలపూడి అనిత గారు పర్యవేక్షిస్తుండగా, శాసనసభ స్పీకర్ చింతకాయల అయ్యన్నపాత్రుడు గారు ప్రాంతీయ గర్వం, సాంస్కృతిక అస్తిత్వాన్ని బలోపేతం చేయాల్సిన అవసరాన్ని నొక్కి చెప్పారు.
నిర్వహణ భాగస్వామి
ఈ ఉత్సవ నిర్వహణ బాధ్యతలను ప్రముఖ ఈవెంట్ సంస్థ శ్రేయాస్ మీడియా చేపట్టింది. గతంలో విజయవాడ ఉత్సవం, ఆత్రేయపురం ఉత్సవం వంటి భారీ కార్యక్రమాలను విజయవంతంగా నిర్వహించిన అనుభవం సంస్థకు ఉందని అధికారులు తెలిపారు.
Author
