Mr India 2026 పోటీలు ఇప్పుడు దేశవ్యాప్తంగా ప్రకంపనలు సృష్టిస్తున్నాయి. ఈ ప్రతిష్ఠాత్మకమైన పోటీల్లో తమిళనాడు తరపున నేషనల్ ఫైనలిస్ట్గా ఎంపికై అందరి దృష్టిని ఆకర్షించారు ప్రధాన్ రాఘవ. రుబారు సంస్థ నిర్వహిస్తున్న ఈ పోటీలకు దేశవ్యాప్తంగా వేలాది మంది దరఖాస్తు చేసుకోగా, తుది దశకు ఎంపికైన 18 మందిలో ప్రధాన్ ఒకరు కావడం విశేషం. గత మూడు నెలలుగా ఆన్లైన్ ద్వారా నిర్వహించిన వివిధ కఠిన పరీక్షలు, పర్సనాలిటీ టెస్టులలో విజయం సాధించి ఆయన ఈ ఘనతను సొంతం చేసుకున్నారు. ప్రస్తుతం గోవాలో జరుగుతున్న ప్రత్యేక శిక్షణ శిబిరంలో ఆయన చురుగ్గా పాల్గొంటున్నారు.
ప్రధాన్ రాఘవ తమిళనాడు నుంచి ప్రాతినిధ్యం వహిస్తున్నప్పటికీ, తన మూలాలు తెలుగు నేలపైనే ఉన్నాయని గర్వంగా చెబుతుంటారు. ఈ Mr India 2026 ఫైనలిస్ట్ స్వగ్రామం ఆంధ్రప్రదేశ్ రాష్ట్రం, కడప జిల్లాలోని ఈటుమారిపురం. ఆయన తండ్రి రాఘవ వెంకట సత్యనారాయణ ఉద్యోగ రీత్యా 1965లోనే తమిళనాడుకు వలస వెళ్లి అక్కడే స్థిరపడ్డారు. ప్రధాన్ తల్లి శిరీష గృహిణి కాగా, సోదరుడు సాయికీర్తి వృత్తిరీత్యా క్రికెటర్. ప్రస్తుతం ప్రధాన్ చెన్నైలోని ప్రతిష్ఠాత్మక లయోలా కళాశాలలో ఎంబీఏ చివరి సంవత్సరం చదువుతూనే తన మోడలింగ్ కెరీర్ను విజయవంతంగా కొనసాగిస్తున్నారు.
చిన్నతనం నుండి క్రీడలపై మక్కువ ఉన్న ప్రధాన్, Mr India 2026 కి రాకముందు టెన్నిస్ క్రీడాకారుడిగా రాణించారు. ఖేలో ఇండియా యూనివర్సిటీ ఛాంపియన్గా నిలిచిన ఆయన జీవితంలో కరోనాకు ముందు జరిగిన ఒక రోడ్డు ప్రమాదం పెద్ద కుదుపునిచ్చింది. ఈ ప్రమాదంలో ఆయన వెన్నెముకకు తీవ్రమైన గాయమైంది. దీనివల్ల ఆయన టెన్నిస్ ఆటకు దూరం కావాల్సి వచ్చింది. అయినప్పటికీ ఆత్మస్థైర్యం కోల్పోకుండా, కోలుకున్న తర్వాత తన ఫిట్నెస్పై దృష్టి సారించి మోడలింగ్ వైపు అడుగులు వేశారు. పలు వాణిజ్య ప్రకటనలలో నటించి ఇప్పటికే మంచి గుర్తింపు తెచ్చుకున్నారు.
ప్రస్తుతం గోవాలో జరుగుతున్న పోటీల్లో టాప్-8 సభ్యుల్లో ఒకరిగా నిలుస్తానని ప్రధాన్ ధీమా వ్యక్తం చేస్తున్నారు. జూన్ లేదా జూలై నెలల్లో ముంబైలో జరగబోయే Mr India 2026 తుది పోటీలలో విజేతగా నిలిచిన ముగ్గురిని ‘మిస్టర్ యూనివర్స్’ పోటీలకు పంపనున్నారు. భారతదేశం తరపున అంతర్జాతీయ వేదికపై ప్రాతినిధ్యం వహించడమే తన లక్ష్యమని ఆయన పేర్కొన్నారు. మోడలింగ్తో పాటు భవిష్యత్తులో సినీ రంగంలో కూడా రాణించాలని, వైవిధ్యమైన పాత్రలు చేయాలని ఆయన ఆకాంక్షిస్తున్నారు. కష్టాలను ఎదురించి నిలబడిన ఆయన ప్రయాణం ఎందరో యువకులకు స్ఫూర్తిదాయకం.
