“అమరావతి.. ఆంధ్రప్రదేశ్ ఆత్మగౌరవ ప్రతీక. ఇప్పుడు ఈ రాజధాని నగరం ప్రపంచ వాస్తుశిల్ప చిత్రపటంలో సరికొత్త చరిత్రను లిఖించబోతోంది. లండన్, మన్హటన్, అబుదాబి నగరాల్లో మాత్రమే కనిపించే అద్భుతమైన ‘డయాగ్రిడ్’ టెక్నాలజీతో అమరావతి సచివాలయం మరియు విభాగాధిపతుల కార్యాలయాలు రూపుదిద్దుకుంటున్నాయి. దేశంలోనే తొలిసారిగా ఐదు భారీ ఆకాశహర్మ్యాలను పూర్తిస్థాయి డయాగ్రిడ్ విధానంలో నిర్మించడం ఒక ఇంజనీరింగ్ అద్భుతం.”
“సాధారణంగా బహుళ అంతస్తుల భవనాలు నిలువు స్తంభాలు, బీమ్స్ ఆధారంగా నిలబడతాయి. కానీ, అమరావతి ఐకానిక్ టవర్లలో వెలుపల ఒక్క స్తంభం కూడా ఉండదు. భవనానికి వెన్నెముకలా నిలిచే ‘కోర్వాల్’ చుట్టూ ఇనుప స్తంభాలను త్రిభుజాకారంలో ఒక దృఢమైన షెల్ లాగా అమరుస్తారు. దీనివల్ల భవనం కేవలం దృఢంగా ఉండటమే కాకుండా, లోపల విశాలమైన ఆఫీస్ స్పేస్ అందుబాటులోకి వస్తుంది. ఈ త్రిభుజాకార నిర్మాణాలే లేటరల్ లోడ్ను తట్టుకుంటూ, తీవ్రమైన తుపాన్లు లేదా భూకంపాలు వచ్చినా భవనం చెక్కుచెదరకుండా కాపాడతాయి.”
“ఈ టవర్లలో అమరుస్తున్న ‘కోర్వాల్’ విస్తీర్ణం 26 x 23 మీటర్లు. లిఫ్టులు, మరుగుదొడ్లు, ఫైర్ సేఫ్టీ వ్యవస్థలన్నీ ఈ కోర్వాల్ లోపలే ఉంటాయి. అత్యంత వేగంగా ప్రయాణించే 15 నుండి 16 లిఫ్టులను ఒక్కో టవర్లో ఏర్పాటు చేస్తున్నారు. కొన్ని చోట్ల ఒకే షాఫ్ట్లో రెండు లిఫ్టులు తిరిగే ‘డ్యూయల్ క్యాప్సూల్’ టెక్నాలజీని వాడుతున్నారు. ఇవి ఒకదానితో ఒకటి ఢీకొట్టకుండా యాంటీ-కొలిజన్ ఇన్స్ట్రుమెంట్స్ను అమర్చడం విశేషం. బయటి వైపు డైమండ్ ఆకారంలో కనిపించే ఈ స్ట్రక్చర్కు సుమారు 2,500 కోట్ల రూపాయల విలువైన ఖరీదైన గాజు పలకలను ‘స్కిన్’ లాగా అమర్చుతున్నారు.”
“ఐదు ప్రధాన టవర్లతో పాటు, 9 ఎమినిటీస్ బ్లాకులను కూడా నిర్మిస్తున్నారు. ఇక్కడ డేటా సెంటర్, బ్యాంకులు, జిమ్, లైబ్రరీ వంటి అత్యాధునిక సదుపాయాలు ఉంటాయి. వీటి టెర్రస్ పైన పచ్చని మిద్దె తోటలను అభివృద్ధి చేస్తున్నారు. సుమారు లక్ష టన్నుల స్ట్రక్చరల్ స్టీల్, 1.60 లక్షల ఘనపు మీటర్ల కాంక్రీటుతో ఈ నిర్మాణాలు సాగుతున్నాయి. రాజధాని నగరానికి వచ్చే ఎవరికైనా ఈ ఐకానిక్ టవర్లు ఒక మరుపురాని అనుభూతిని మిగులుస్తాయి. ప్రపంచంలోని ప్రసిద్ధ హెరస్ట్ టవర్, క్యాపిటల్ గేట్ సరసన అమరావతి ఐకానిక్ టవర్లు నిలబడబోతున్నాయి. ఇది మన అమరావతి.. మన గర్వకారణం!”
