బాపట్ల, జూన్ 19 :– జర్నలిస్టుల పిల్లలకు ప్రైవేట్, కార్పొరేట్ విద్యాసంస్థల్లో విద్యా ఫీజులపై 50 శాతం రాయితీ కల్పించేలా చర్యలు తీసుకోవాలని ఆంధ్రప్రదేశ్ యూనియన్ ఆఫ్ వర్కింగ్ జర్నలిస్ట్స్ (ఏపీయూడబ్ల్యూజే) బాపట్ల జిల్లా శాఖ జిల్లా కలెక్టర్ డాక్టర్ వి. వినోద్ కుమార్ను కోరింది. ఈ మేరకు సంఘం నాయకులు శుక్రవారం కలెక్టర్ను కలిసి వినతిపత్రం సమర్పించారు.
ఈ సందర్భంగా సంఘం ప్రతినిధులు మాట్లాడుతూ, ప్రజలకు నిరంతరం సమాచారాన్ని అందిస్తూ సమాజానికి సేవలందిస్తున్న జర్నలిస్టులు ప్రస్తుతం పెరుగుతున్న విద్యా ఖర్చుల కారణంగా ఆర్థిక ఇబ్బందులు ఎదుర్కొంటున్నారని తెలిపారు. ముఖ్యంగా తమ పిల్లలకు నాణ్యమైన విద్యను అందించేందుకు అధిక ఫీజులు భారంగా మారుతున్నాయని పేర్కొన్నారు. జర్నలిస్టుల కుటుంబాలకు ఉపశమనం కలిగించేలా ప్రైవేట్, కార్పొరేట్ విద్యాసంస్థల్లో ఫీజులపై 50 శాతం రాయితీ అమలు చేయాలని కోరారు.
వినతిపత్రాన్ని స్వీకరించిన జిల్లా కలెక్టర్ డాక్టర్ వి. వినోద్ కుమార్ సమస్యను సానుకూలంగా పరిశీలిస్తామని హామీ ఇచ్చినట్లు సంఘం నాయకులు తెలిపారు. జిల్లాలోని ప్రైవేట్, కార్పొరేట్ విద్యాసంస్థల యాజమాన్యాలతో చర్చించి జర్నలిస్టుల పిల్లలకు ఫీజు రాయితీ కల్పించే అంశాన్ని పరిశీలించి తగిన చర్యలు తీసుకుంటామని కలెక్టర్ పేర్కొన్నట్లు వెల్లడించారు.
ఈ కార్యక్రమంలో ఏపీయూడబ్ల్యూజే జిల్లా అధ్యక్షుడు రాంబాబు, గొర్ల శ్రీనివాసరావు, పరిశా వెంకట్, చంటి, ఉమా, కత్తి రాజు, సోహెల్, శ్రీనివాసరావు తదితరులు పాల్గొన్నారు.
జర్నలిస్టుల సంక్షేమానికి సంబంధించిన ఈ వినతిపై జిల్లా వ్యాప్తంగా జర్నలిస్టులు హర్షం వ్యక్తం చేస్తున్నారు.
