అమరావతి:- రాజధాని అమరావతిలో ప్రతిష్టాత్మక ‘బ్యాంక్ స్ట్రీట్’ నిర్మాణ పనులను వేగవంతం చేయాలని ముఖ్యమంత్రి నారా చంద్రబాబు నాయుడు సీఆర్డీఏ అధికారులను ఆదేశించారు. శుక్రవారం సీఎం క్యాంపు కార్యాలయంలో ఆయన అధ్యక్షతన సీఆర్డీఏ అథారిటీ సమావేశం నిర్వహించారు. ఈ సమావేశంలో మున్సిపల్ శాఖ మంత్రి నారాయణ వర్చువల్ విధానంలో పాల్గొనగా, సీఆర్డీఏ, మున్సిపల్ శాఖల ఉన్నతాధికారులు హాజరయ్యారు.
రాజధానిలోని ఫైనాన్షియల్ డిస్ట్రిక్ట్లో బ్యాంకుల ప్రధాన కార్యాలయాల నిర్మాణ పనుల పురోగతిపై ఈ సందర్భంగా సుదీర్ఘంగా చర్చించారు.
సీపీడబ్ల్యూడీ పరిధిలోకి 11 బ్యాంకులు
బ్యాంక్ స్ట్రీట్లో తమ కార్యాలయాలను ఏర్పాటు చేసేందుకు ముందుకొచ్చిన 13 బ్యాంకుల్లో, 11 బ్యాంకులు తమ నిర్మాణ బాధ్యతలను కేంద్ర ప్రభుత్వ రంగ సంస్థ అయిన సీపీడబ్ల్యూడీ (CPWD) కి అప్పగించినట్లు అధికారులు ముఖ్యమంత్రికి వివరించారు. బ్యాంకులకు అవసరమైన అన్ని రకాల నిర్మాణ అనుమతులను జాప్యం లేకుండా త్వరితగతిన మంజూరు చేయాలని, సీఆర్డీఏ వైపు నుంచి పూర్తి సహకారం అందించాలని సీఎం స్పష్టం చేశారు.
పీపీపీ విధానంలో డిజిటల్ మౌలిక వసతులు
అమరావతిని అత్యాధునిక డిజిటల్ నగరంగా తీర్చిదిద్దడమే లక్ష్యంగా ఫోన్, కేబుల్, ఇంటర్నెట్ కనెక్టివిటీకి ఎలాంటి అంతరాయం లేకుండా చూడాలని సీఎం ఆదేశించారు. ఇందుకోసం ప్రభుత్వ, ప్రైవేటు భాగస్వామ్య (PPP) విధానంలో డిజిటల్ మౌలిక వసతులను కల్పించేలా ప్రత్యేక శ్రద్ధ తీసుకోవాలన్నారు.
నివాస వ్యయం తగ్గింపు.. డిస్ట్రిక్ట్ కూలింగ్కు మొగ్గు
రాజధానిలో ప్రజల నివాస వ్యయాన్ని తగ్గించేలా ప్రణాళికలు రూపొందించాలని సీఎం సూచించారు.
- నగరవ్యాప్తంగా పైప్డ్ గ్యాస్ కనెక్షన్లు అందించడంతో పాటు ఇండక్షన్ స్టవ్ల వినియోగాన్ని పెద్ద ఎత్తున ప్రోత్సహించాలన్నారు.
- పర్యావరణ హితంగా ఉండేలా ‘డిస్ట్రిక్ట్ కూలింగ్’ వంటి కేంద్రీకృత శీతలీకరణ వ్యవస్థలను అందుబాటులోకి తీసుకురావాలని దిశానిర్దేశం చేశారు.
ఏడాది పొడవునా జలకళ.. పర్యాటకానికి పెద్దపీట
రాజధాని సుందరీకరణలో భాగంగా ప్రకాశం బ్యారేజీకి ఎగువన వైకుంఠపురం వరకు ఏడాది పొడవునా నీళ్లు నిలిచి ఉండేలా చర్యలు తీసుకోవాలని ముఖ్యమంత్రి అధికారులను ఆదేశించారు. దీనివల్ల జలక్రీడలు, స్విమ్మింగ్ వంటి సాహస పర్యాటక (Water Sports) కార్యకలాపాలకు అద్భుతమైన అవకాశాలు ఏర్పడతాయని ఆయన అభిప్రాయపడ్డారు.
ఇతర కీలక నిర్ణయాలు: ఈ ఉన్నత స్థాయి సమావేశంలో కృష్ణా కరకట్ట నిర్మాణ పనుల పురోగతి, ఉండవల్లి గ్రామంలో ఎల్పీఎస్ (LPS) లేఅవుట్ల అభివృద్ధి, పార్కింగ్ కాంప్లెక్స్ ల ఏర్పాటు, జ్యూడిషియల్ అకాడెమీ నిర్మాణం మరియు పౌల్ట్రీ ఫారాల నిర్మాణాలకు చెల్లించాల్సిన పరిహారం వంటి పలు కీలక అంశాలపై చర్చించి అధికారులు దిశానిర్దేశం చేశారు.
