కోల్కతా, జూన్ 19:– ఆంధ్రప్రదేశ్ను గ్లోబల్ గ్రీన్ ఎనర్జీ హబ్గా మార్చే దిశగా రాష్ట్ర ప్రభుత్వం మరో కీలక ముందడుగు వేసింది. పశ్చిమ బెంగాల్ పర్యటనలో ఉన్న రాష్ట్ర విద్యా, ఐటీ, ఎలక్ట్రానిక్స్ శాఖల మంత్రి నారా లోకేష్ శుక్రవారం కోల్కతాలో ప్రముఖ సౌర ఇంధన సంస్థ ‘విక్రమ్ సోలార్’ చైర్మన్ & ఎండీ జ్ఞానేష్ చౌదరి, సీఈఓ అరుణ్ మిట్టల్లతో కీలక భేటీ నిర్వహించారు. రాయలసీమ ప్రాంతంలో ఇంటిగ్రేటెడ్ సోలార్ హబ్తో పాటు పవర్హైవ్ స్టోరేజ్ విస్తరణ ప్రాజెక్టును ఏర్పాటు చేయాలని ఈ సందర్భంగా వారిని మంత్రి కోరారు.
5 ఏళ్లలో 78.5 గిగావాట్ల లక్ష్యం!
రాష్ట్రంలో పారిశ్రామికాభివృద్ధి, పెట్టుబడుల అవకాశాలపై విక్రమ్ సోలార్ ప్రతినిధులతో మంత్రి లోకేష్ సుదీర్ఘంగా చర్చించారు. ఈ సందర్భంగా ఆయన మాట్లాడుతూ… ఏపీని గ్రీన్ ఎనర్జీ రంగంలో అగ్రగామిగా నిలిపేందుకు తమ ప్రభుత్వం ప్రతిష్టాత్మక ‘ఇంటిగ్రేటెడ్ క్లీన్ ఎనర్జీ పాలసీ’ని తీసుకువచ్చిందని గుర్తుచేశారు. రాబోయే ఐదేళ్లలో పునరుత్పాదక ఇంధన (రెన్యువబుల్ ఎనర్జీ) రంగంలో ఏకంగా 78.5 గిగావాట్ల భారీ సామర్థ్యాన్ని సాధించడమే లక్ష్యంగా ప్రణాళికలు సిద్ధం చేశామని స్పష్టం చేశారు.
₹10 లక్షల కోట్ల పెట్టుబడులు – 7.5 లక్షల ఉద్యోగాలు
క్లీన్ ఎనర్జీ రంగం ద్వారా రాష్ట్రంలోకి భారీగా పెట్టుబడులను ఆకర్షించడమే కాకుండా, నిరుద్యోగ యువతకు ఉపాధి కల్పించడమే ధ్యేయంగా ప్రభుత్వం పనిచేస్తోందని లోకేష్ వివరించారు.
- ఈ రంగం ద్వారా రాబోయే రోజుల్లో రూ. 10 లక్షల కోట్ల పెట్టుబడులను రాబట్టాలని లక్ష్యంగా పెట్టుకున్నట్లు తెలిపారు.
- తద్వారా రాష్ట్రంలో సుమారు 7.5 లక్షల మందికి ఉద్యోగ, ఉపాధి అవకాశాలు లభిస్తాయని ఆయన ధీమా వ్యక్తం చేశారు.
సౌర విద్యుత్కు కేరాఫ్ అడ్రస్గా రాయలసీమ
రాయలసీమ ప్రాంతం సౌర విద్యుత్ ప్రాజెక్టులకు అత్యంత అనుకూలమైనదని, ఇప్పటికే పలు దిగ్గజ సంస్థలు ఇక్కడ ప్రాజెక్టులు పెడుతున్నాయని మంత్రి లోకేష్ ఈ భేటీలో ప్రస్తావించారు. రిలయన్స్ సంస్థ ఏర్పాటు చేయబోయే 5వేల మెగావాట్ల సౌర విద్యుత్ ప్రాజెక్ట్, అలాగే SAEL సంస్థకు చెందిన 600 మెగావాట్ల ప్లాంట్లే ఇందుకు నిదర్శనమన్నారు. ఏపీ ప్రభుత్వం అందిస్తున్న పారిశ్రామిక ప్రోత్సాహకాలను, రాయితీలను ఉపయోగించుకుని విక్రమ్ సోలార్ లిమిటెడ్ (VSL) రాయలసీమలో తన కార్యకలాపాలను విస్తరించాలని, దీనికి ప్రభుత్వం తరఫున పూర్తి సహకారం అందిస్తామని మంత్రి లోకేష్ హామీ ఇచ్చారు.
