పల్నాడు జిల్లా:- వినుకొండ పట్టణాన్ని పరిశుభ్రంగా, స్వచ్ఛంగా తీర్చిదిద్దే దిశగా మరో కీలక అడుగు పడింది. స్వచ్ఛ భారత్ మిషన్ 2.0 నిధులతో రూ. 2 కోట్ల 2 లక్షల వ్యయంతో నిర్మించనున్న తడి, పొడి చెత్త వ్యర్థాల శుద్ధి కేంద్రానికి సోమవారం ఘనంగా శంకుస్థాపన జరిగింది.
వినుకొండ మున్సిపాలిటీ పరిధిలో కారంపూడి రోడ్డులోని చెక్కవాగు ప్రాంతంలో ఏర్పాటు చేయనున్న ఈ ఆధునిక వ్యర్థాల శుద్ధి కేంద్రానికి ప్రభుత్వ చీఫ్ విప్ జీవీ ఆంజనేయులు ముఖ్య అతిథిగా హాజరై శిలాఫలకాన్ని ఆవిష్కరించి శంకుస్థాపన చేశారు. స్వచ్ఛ భారత్ మిషన్ (ఎస్బీఎం 2.0) నిధుల ద్వారా రూ. 2.02 కోట్ల అంచనా వ్యయంతో ఈ కేంద్రాన్ని నిర్మించనున్నారు.
ఈ సందర్భంగా మాట్లాడిన జీవీ ఆంజనేయులు, పట్టణంలో ఉత్పత్తి అవుతున్న తడి, పొడి చెత్తను శాస్త్రీయ పద్ధతుల్లో శుద్ధి చేసి పర్యావరణ పరిరక్షణకు తోడ్పడటంతో పాటు ప్రజారోగ్యాన్ని మెరుగుపర్చేందుకు ఈ కేంద్రం ఉపయోగపడుతుందని తెలిపారు. పట్టణాన్ని మరింత పరిశుభ్రంగా, ఆరోగ్యకరంగా తీర్చిదిద్దడంలో ఈ ప్రాజెక్టు కీలక పాత్ర పోషిస్తుందని పేర్కొన్నారు.
ఈ కార్యక్రమంలో మక్కెన మల్లికార్జున రావు, మున్సిపల్ అధికారులు, కూటమి నాయకులు, ప్రజాప్రతినిధులు మరియు స్థానిక ప్రజలు పాల్గొన్నారు.
