ఏలూరు జిల్లా :- కాంగ్రెస్ కార్యాలయంలో మాజీ ప్రధాని రాజీవ్ గాంధీ 82వ జయంతి వేడుకలను ఘనంగా నిర్వహించారు. జిల్లా కాంగ్రెస్ అధ్యక్షుడు రాజనాల రామ్మోహన్ రావు అధ్యక్షతన జరిగిన ఈ కార్యక్రమంలో రాజీవ్ గాంధీ చిత్రపటానికి పూలమాల వేసి నివాళులర్పించారు. అనంతరం కేక్ కట్ చేసి కార్యకర్తలకు స్వీట్లు పంపిణీ చేశారు.
ఈ సందర్భంగా రాజనాల రామ్మోహన్ రావు మాట్లాడుతూ.. దేశంలో సైన్స్ అండ్ టెక్నాలజీ రంగాన్ని అభివృద్ధి చేయడంలో రాజీవ్ గాంధీ కీలక పాత్ర పోషించారని అన్నారు. ఢిల్లీ నుంచి నేరుగా గ్రామస్థాయికి, పంచాయతీలకు నిధులు చేరేలా చర్యలు తీసుకున్నారని తెలిపారు. నగర పాలక బిల్లు ప్రవేశపెట్టి మహిళలు, బీసీలకు స్థానిక సంస్థల్లో 33 శాతం రిజర్వేషన్లు కల్పించేందుకు కృషి చేశారని పేర్కొన్నారు.
యువతను ప్రజాస్వామ్య ప్రక్రియలో భాగస్వామ్యం చేసేందుకు 18 ఏళ్లకే ఓటు హక్కు కల్పించిన ఘనత కూడా రాజీవ్ గాంధీకే దక్కుతుందని రాజనాల రామ్మోహన్ రావు కొనియాడారు. దేశ అభివృద్ధి, ఆధునికీకరణకు రాజీవ్ గాంధీ చేసిన కృషి చిరస్మరణీయమని అన్నారు.
ఈ కార్యక్రమంలో జిల్లా రాజీవ్ గాంధీ అభియాన్ అధ్యక్షుడు మంతెన నరసింహారావు, ఏలూరు సిటీ కాంగ్రెస్ అధ్యక్షుడు ప్రతాప సుబ్రహ్మణ్య శర్మ, ఏలూరు సిటీ యువజన కాంగ్రెస్ అధ్యక్షుడు బురదగుంట లివిన్ క్రిస్టియన్, జిల్లా ప్రధాన కార్యదర్శులు దండు బోయిన చంద్రశేఖర్, అనుకోజు శ్రీనివాసరావు, గౌడు రంగబాబు, కొమ్మన సాంబశివరావు, బురదగుంట క్రాంతి, దాసరి రాంప్రసాద్, పులి మార్కండేయులు, మహిళా కాంగ్రెస్ అధ్యక్షురాలు పెద్దిరెడ్డి పద్మ, సేవాదళ్ నాయకుడు సుబ్బారావు తదితరులు పాల్గొన్నారు.
సుమారు 100 మంది కాంగ్రెస్ కార్యకర్తలు ఈ కార్యక్రమానికి హాజరై రాజీవ్ గాంధీకి ఘన నివాళులర్పించారు. అనంతరం కార్యకర్తలకు స్వీట్లు పంపిణీ చేశారు.
