కుప్పం (ప్రత్యేక ప్రతినిధి):– నారావారిపల్లె తనకు జన్మనిస్తే, కుప్పం నియోజకవర్గం తనకు రాజకీయ జీవితాన్ని ప్రసాదించిందని ముఖ్యమంత్రి నారా చంద్రబాబు నాయుడు ఆత్మీయంగా స్మరించుకున్నారు. కుప్పాన్ని ఒక మోడల్ నియోజకవర్గంగా, “స్వర్ణ కుప్పం”గా తీర్చిదిద్దేందుకు సమగ్ర ప్రణాళికతో ముందుకెళ్తున్నామని ఆయన పునరుద్ఘాటించారు. సోమవారం కుప్పం పర్యటనలో భాగంగా రూ.327 కోట్ల విలువైన పలు అభివృద్ధి కార్యక్రమాలకు సీఎం భూమిపూజలు, శంకుస్థాపనలు చేశారు.
ఈ సందర్భంగా ఏర్పాటు చేసిన బహిరంగ సభలో ముఖ్యమంత్రి మాట్లాడుతూ… హంద్రీనీవా కాలువ ద్వారా నీటిని తీసుకొచ్చి ఇప్పటికే 133 చెరువులను నింపామని, నియోజకవర్గంలోని 550కి పైగా చిన్న నీటిపారుదల చెరువులను లిఫ్ట్ ఇరిగేషన్, పైప్లైన్ల ద్వారా అనుసంధానిస్తామని చెప్పారు. బీరువానిపల్లి వద్ద హంద్రీనీవా సుజల స్రవంతి కుప్పం బ్రాంచ్ కెనాల్ ఆధారంగా రూ.45 కోట్లతో నూతన రిజర్వాయర్ నిర్మించనున్నట్లు వెల్లడించారు. యామిగానిపల్లి, మనపల్లి ప్రాంతాల్లో కూడా రిజర్వాయర్ల ఏర్పాటు అంశాన్ని పరిశీలిస్తున్నట్లు తెలిపారు.Amaravathi Local News
ప్రకృతి సేద్యమే శ్రీరామరక్ష: ఈ ఏడాది ఎల్నినో ప్రభావం వల్ల వర్షాభావ పరిస్థితులు నెలకొన్నందున నీటిని పొదుపుగా వాడుకోవాలని సీఎం పిలుపునిచ్చారు. రసాయన ఎరువుల వాడకాన్ని తగ్గించి, “ప్రకృతి సేద్యమే శ్రీరామరక్ష” అనే సూత్రంతో ప్రత్యామ్నాయ పంటలు, సూక్ష్మ సాగునీటి విధానాలపై రైతులు దృష్టి సారించాలని కోరారు. తక్కువ నీటితో పండే చిరుధాన్యాలు, ఉద్యాన పంటలతో పాటు పశుపోషణ ద్వారా అదనపు ఆదాయం పొందవచ్చని సూచించారు.
ప్రతి ఇల్లూ ఒక విద్యుత్ ఉత్పత్తి కేంద్రం: కుప్పాన్ని నెట్జీరో నియోజకవర్గంగా మారుస్తామని సీఎం ప్రకటించారు. ప్రతి ఇంటిపైనా సోలార్ రూఫ్టాప్లు ఏర్పాటు చేసి, ప్రతి ఇంటినీ విద్యుత్ ఉత్పత్తి కేంద్రంగా తీర్చిదిద్దనున్నట్లు తెలిపారు. వ్యవసాయ ఫీడర్ల కోసం 15 మెగావాట్ల సామర్థ్యంతో ఏర్పాటు చేసిన పీఎమ్-కుసుమ్ (PM-KUSUM) సోలార్ ప్రాజెక్టులను ఈ సందర్భంగా ఆయన ప్రారంభించారు.
పారిశ్రామిక విప్లవం & P4 మోడల్: కుప్పంలో పేదరికాన్ని నిర్మూలించడమే ధ్యేయంగా P4 (Public-Private-People Partnership) కార్యక్రమం ద్వారా 8,904 బంగారు కుటుంబాలను గుర్తించామని తెలిపారు. టీవీఎస్, అదానీ, మెగా వంటి ప్రముఖ సంస్థలు ఈ కుటుంబాలను దత్తత తీసుకుని ఆర్థికంగా నిలబెడుతున్నాయని చెప్పారు. బిర్లా ఇన్స్టిట్యూట్, మానస సరోవర్ గ్లోబల్ యూనివర్సిటీల భాగస్వామ్యంతో స్థానిక యువతకు నైపుణ్య శిక్షణ ఇచ్చి స్థానిక పరిశ్రమల్లోనే ఉద్యోగాలు కల్పిస్తున్నామన్నారు.
పలు మౌలిక వసతుల పనులకు శ్రీకారం:
- మున్సిపాలిటీ పరిధిలో రూ.38 కోట్ల విలువైన ప్రభుత్వ పనులు, మరో రూ.289 కోట్ల అభివృద్ది ప్రాజెక్టులకు భూమిపూజ.
- రూ.3.30 కోట్లతో నిర్మించిన సమగ్ర ఘన వ్యర్థాల నిర్వహణ ప్లాంట్, మెటీరియల్ రికవరీ సెంటర్ ప్రారంభం.
- రూ.10 కోట్లతో ఆర్డీఓ, ఏఎస్పీ కార్యాలయాల నిర్మాణానికి శంకుస్థాపన.
- రూ.2.70 కోట్లతో మల్లనూరు జూనియర్ కళాశాల పనులు, రూ.2.50 కోట్లతో మార్కెట్ యార్డ్ అభివృద్ధి పనులకు శ్రీకారం.
మెరుగైన రవాణా – కనెక్టివిటీ: కుప్పం రైల్వే స్టేషన్లో దాదర్-పుదుచ్చేరి ఎక్స్ప్రెస్ నిలిచేలా చర్యలు తీసుకున్నామని, బెంగళూరు, చెన్నై, కేజీఎఫ్, కృష్ణగిరి ప్రాంతాలను కలిపేలా జాతీయ రహదారుల నిర్మాణం వేగవంతం చేశామని తెలిపారు. కుప్పం-పొగురుపల్లి మీదుగా బెంగళూరుకు ప్రత్యామ్నాయ రహదారి, చిత్తూరు-కుప్పం బ్రాడ్గేజ్ రైలు మార్గంపై దృష్టి పెట్టామని, భవిష్యత్తులో కుప్పంలో విమానాశ్రయం ఏర్పాటు చేస్తామని హామీ ఇచ్చారు.
ప్రజలతో నేరుగా ముఖాముఖి: ఈ పర్యటనలో భాగంగా సీఎం రైతులు, యువత, మహిళలతో ముఖాముఖి నిర్వహించారు. P4 పథకం ద్వారా ఇటుకల బట్టీ నెలకొల్పి పారిశ్రామికవేత్తగా మారిన లక్ష్మి అనే మహిళను, కుప్పంలో ఉద్యోగం సాధించిన సురేఖను ప్రత్యేకంగా అభినందించారు. అలాగే కడా (KADA) నిర్వహించిన వీడియో కాంటెస్ట్ విజేతలను సత్కరించారు. ఈ కార్యక్రమంలో చిత్తూరు జిల్లా ప్రజాప్రతినిధులు, ఉన్నతాధికారులు పాల్గొన్నారు.
