అంతర్జాతీయ రాజకీయ యవనికపై పాకిస్థాన్కు మరోసారి తీవ్ర అవమానం ఎదురైంది. అగ్రరాజ్యం అమెరికా, ఇస్లామిక్ దేశం ఇరాన్ మధ్య నెలకొన్న యుద్ధ వాతావరణాన్ని చల్లార్చేందుకు మధ్యవర్తిగా అవతరించాలని చూసిన పాకిస్థాన్ ఆశలపై ఇరాన్ నీళ్లు చల్లింది. ఇరు దేశాల మధ్య శాంతిని నెలకొల్పుతామని ప్రగల్భాలు పలికిన ఇస్లామాబాద్ను ఇరాన్ నమ్మడం లేదు సరే కదా.. కనీసం నిష్పక్షపాతంగా వ్యవహరించే నైతికత కూడా ఆ దేశానికి లేదని బహిరంగంగానే తేల్చి చెప్పింది. ఈ పరిణామం ఇప్పుడు పశ్చిమ ఆసియా రాజకీయాల్లో పెను సంచలనంగా మారింది.
గత కొంతకాలంగా అమెరికా-ఇరాన్ మధ్య తీవ్ర స్థాయి ఘర్షణ వాతావరణం నెలకొన్న సంగతి తెలిసిందే. ఈ క్రమంలోనే దౌత్యపరమైన చర్చల ద్వారా సమస్యను పరిష్కరిస్తామని పాకిస్థాన్ ముందుకు వచ్చింది. అయితే, ఈ మధ్యవర్తిత్వ ప్రయత్నాలను ఇరాన్ పార్లమెంట్ వేదికగా ఆ దేశ ప్రతినిధులు తీవ్రంగా ఎండగట్టారు. పాకిస్థాన్ వైఖరి నిష్పక్షపాతంగా లేదని, అది కేవలం అమెరికా ప్రయోజనాల కోసమే పనిచేస్తోందని ఇరాన్ ఎంపీలు మండిపడ్డారు. ముఖ్యంగా ఇస్లామాబాద్ తీసుకుంటున్న నిర్ణయాలు వాషింగ్టన్కు అనుకూలంగా ఉన్నాయని, ఇలాంటి దేశం మధ్యవర్తిగా ఉంటే తమ ప్రయోజనాలు దెబ్బతింటాయని ఇరాన్ బలంగా నమ్ముతోంది.
వాస్తవానికి పాకిస్థాన్ ఆర్థికంగా మరియు రక్షణ పరంగా అమెరికాపై ఎక్కువగా ఆధారపడి ఉంటుంది. ఈ బలహీనతను ఆసరాగా చేసుకునే అమెరికా చెప్పినట్లు పాక్ నడుచుకుంటోందని ఇరాన్ ఆరోపిస్తోంది. చర్చల పేరుతో తమ దేశ రహస్యాలను సేకరించే అవకాశం కూడా ఉందని ఇరాన్ అనుమానిస్తోంది. దీంతో పాకిస్థాన్ నేతృత్వంలో జరగాల్సిన మలివిడత చర్చల భవిష్యత్తు ఇప్పుడు ప్రశ్నార్థకంగా మారింది. ఇరాన్ తీసుకున్న ఈ కఠిన నిర్ణయంతో పాకిస్థాన్ అంతర్జాతీయ స్థాయిలో ఒంటరయ్యే పరిస్థితి కనిపిస్తోంది. మరోవైపు, తమ దేశ సార్వభౌమత్వానికి భంగం కలిగించే ఏ ప్రయత్నాన్ని అయినా సహించబోమని ఇరాన్ స్పష్టం చేసింది.
