గుంటూరు, అక్టోబర్ 29:-జడ్పీటీసీ, ఎంపీటీసీ ఎన్నికల విధుల్లో పాల్గొనే ఉద్యోగులు తమ ఓటు హక్కును వినియోగించుకునేందుకు ఈ నెల 30, 31 తేదీల్లో పోస్టల్ బ్యాలెట్ ఫెసిలిటేషన్ కేంద్రాలను ఏర్పాటు చేయనున్నట్లు జిల్లా కలెక్టర్, జిల్లా ఎన్నికల అధికారి సి.యం. సాయికాంత్ వర్మ తెలిపారు. ప్రతి మండల పరిషత్ కార్యాలయంలో ఈ కేంద్రాలు అందుబాటులో ఉంటాయని వెల్లడించారు.
గురువారం కలెక్టరేట్‌లో జడ్పీటీసీ, ఎంపీటీసీ ఎన్నికల రిటర్నింగ్ అధికారులతో నిర్వహించిన సమీక్ష సమావేశంలో కలెక్టర్ ఎన్నికల ఏర్పాట్లపై పలు సూచనలు చేశారు. పోస్టల్ బ్యాలెట్ ద్వారా ఓటు వేయడానికి వచ్చే సిబ్బంది ఓటరు గుర్తింపు కార్డు, ఎన్నికల విధుల కేటాయింపు ఉత్తర్వులను తప్పనిసరిగా తీసుకురావాలని సూచించారు. కేంద్రాల్లో హెల్ప్‌డెస్క్‌లతో పాటు పత్రాల ధ్రువీకరణ కోసం గెజిటెడ్ అధికారులను అందుబాటులో ఉంచనున్నట్లు తెలిపారు.
ఎన్నికలకు అవసరమైన పోస్టల్ బ్యాలెట్లను ముందుగానే సిద్ధం చేయాలని, రూట్ల వారీగా ఎన్నికల సామగ్రి పంపిణీ చేయాలని అధికారులను ఆదేశించారు. ఎన్నికల సిబ్బందికి ఎలాంటి ఇబ్బందులు కలగకుండా అన్ని ఏర్పాట్లు పూర్తి చేయాలని స్పష్టం చేశారు. పోలింగ్ కేంద్రాల్లో రాత్రి బస చేసే సిబ్బందికి అవసరమైన సౌకర్యాలు కల్పించాలని, దోమల నివారణకు మస్కిటో కాయిల్స్ వంటి వస్తువులను అందుబాటులో ఉంచాలని సూచించారు.
మున్సిపల్ ఎన్నికలకు ఏర్పాట్లు పూర్తి చేయాలి
గుంటూరు నగరపాలక సంస్థ ఎన్నికలకు సంబంధించి ఆంధ్రా ముస్లిం కళాశాలలో ఎన్నికల సామగ్రి పంపిణీ కేంద్రాన్ని ఏర్పాటు చేసినట్లు కలెక్టర్ తెలిపారు. ఆచార్య నాగార్జున విశ్వవిద్యాలయంలో స్ట్రాంగ్ రూమ్, రిసెప్షన్ కేంద్రం, కౌంటింగ్ కేంద్రాలను ఏర్పాటు చేసినట్లు వివరించారు.
తెనాలి పురపాలక సంఘానికి సంబంధించి ఎన్నికల సామగ్రి పంపిణీ కేంద్రం, స్ట్రాంగ్ రూమ్, రిసెప్షన్ కేంద్రం, కౌంటింగ్ కేంద్రాలను తెనాలిలోని వి.ఎస్.ఆర్. కళాశాలలో ఏర్పాటు చేసినట్లు చెప్పారు. మున్సిపల్ ఎన్నికల సామగ్రి పంపిణీ ఈ నెల 31న, పోలింగ్ నవంబర్ 1న, ఓట్ల లెక్కింపు నవంబర్ 3న నిర్వహించనున్నట్లు తెలిపారు.
జడ్పీటీసీ, ఎంపీటీసీ ఎన్నికల పోలింగ్ నవంబర్ 5న, ఓట్ల లెక్కింపు నవంబర్ 7న జరగనుందని వెల్లడించారు. ఈ ఎన్నికలకు సంబంధించిన ఫొటో ఓటరు స్లిప్పుల పంపిణీ నవంబర్ 2 నాటికి పూర్తి చేయాలని, నవంబర్ 3 నాటికి మార్క్‌డ్ కాపీలను సిద్ధం చేయాలని ఆదేశించారు. ఎన్నికల సిబ్బందికి రెండో విడత శిక్షణ, రెండో రాండమైజేషన్ కార్యక్రమాలు శుక్రవారం నిర్వహించనున్నట్లు తెలిపారు.
గుంటూరులో 596 పోలింగ్ కేంద్రాలు
గుంటూరు నగరపాలక సంస్థ కమిషనర్ కె. మయూర్ అశోక్ మాట్లాడుతూ నగరపాలక సంస్థ పరిధిలో మొత్తం 596 పోలింగ్ కేంద్రాలు ఉన్నాయని తెలిపారు. అన్ని కేంద్రాల్లో కనీస మౌలిక సదుపాయాలు కల్పిస్తున్నామని, 207 పోలింగ్ కేంద్రాల్లో వెబ్‌కాస్టింగ్ ఏర్పాటు చేస్తున్నామని వెల్లడించారు.Guntur City News
ఫొటో ఓటరు స్లిప్పుల పంపిణీ 75 శాతం పూర్తయిందని, పోస్టల్ బ్యాలెట్, సర్వీస్ ఓటర్లకు సంబంధించి 1,091 ఓట్లు అందించినట్లు వివరించారు. సర్వీస్ ఓటర్ల నుంచి ఇంకా ఓట్లు అందాల్సి ఉందని తెలిపారు.
తెనాలి పురపాలక సంఘం కమిషనర్ జె. రామ అప్పల నాయుడు మాట్లాడుతూ 295 పోస్టల్ బ్యాలెట్లు, 36 మంది సర్వీస్ ఓటర్లకు సంబంధించిన ఓటింగ్ ఏర్పాట్లు చేసినట్లు తెలిపారు. ఫొటో ఓటరు స్లిప్పుల పంపిణీ 83 శాతం పూర్తయిందని వెల్లడించారు.
ఈ సమావేశంలో జాయింట్ కలెక్టర్ అశుతోష్ శ్రీవాస్తవ, జిల్లా రెవెన్యూ అధికారి ఎన్.ఎస్.కె. ఖాజావలి, జిల్లా పరిషత్ ముఖ్య కార్యనిర్వహణ అధికారి వి. జ్యోతి బసు, జిల్లా పంచాయతీ అధికారి బి.వి. నాగ సాయి కుమార్, రిటర్నింగ్ అధికారులు పాల్గొన్నారు.
