గుంటూరు :-పరిసరాల పరిశుభ్రతను ఒక ధ్యేయంగా మార్చుకుని, ఆరోగ్యకరమైన సమాజ నిర్మాణానికి ప్రతి ఒక్కరూ నడుం బిగించాలని జిల్లా యంత్రాంగం పిలుపునిచ్చింది. జిల్లా కలెక్టర్ సి.యం. సాయికాంత్ వర్మ ఆదేశాల మేరకు శనివారం గుంటూరు వ్యాప్తంగా “స్వర్ణ ఆంధ్రా – స్వచ్ఛ ఆంధ్రా” కార్యక్రమాన్ని అత్యంత ప్రతిష్టాత్మకంగా నిర్వహించారు.
నియోజకవర్గ, మండల స్థాయి ప్రత్యేక అధికారులు ఈ కార్యక్రమంలో నేరుగా పాల్గొని పరిశుభ్రత పనులను పర్యవేక్షించారు. ఇందులో భాగంగా పలుచోట్ల పెద్ద ఎత్తున మొక్కలు నాటడమే కాకుండా, పర్యావరణ పరిరక్షణపై స్థానిక ప్రజలతో “స్వర్ణ ఆంధ్రా – స్వచ్ఛ ఆంధ్రా” ప్రతిజ్ఞ చేయించారు.
ప్లాస్టిక్ రహిత సమాజమే లక్ష్యం: డిపిఓ నాగ సాయి కుమార్
పెదకాకాని మండలంలో జరిగిన కార్యక్రమంలో జిల్లా పంచాయతీ అధికారి (డిపిఓ) బి.వి. నాగ సాయి కుమార్ పాల్గొని మాట్లాడారు. రాష్ట్ర ప్రభుత్వం ప్రతి నెలా మూడవ శనివారాన్ని పరిశుభ్రత దినోత్సవంగా నిర్వహిస్తోందని, ఈ బృహత్తర యజ్ఞంలో ప్రజలందరూ స్వచ్ఛందంగా భాగస్వాములు కావాలని కోరారు.Guntur Distric News
ఆయన పంచుకున్న ముఖ్య విషయాలు:
- ప్లాస్టిక్ వాడకానికి స్వస్తి: పర్యావరణానికి తీవ్ర విఘాతం కలిగిస్తున్న సింగిల్ యూజ్ ప్లాస్టిక్ కవర్లు, క్యారీ బ్యాగులను పూర్తిగా నిషేధించి, వాటి స్థానంలో కాటన్ లేదా గన్నీ (జనపనార) బ్యాగులను నిత్య జీవితంలో భాగం చేసుకోవాలి.
- చెత్త సేకరణకు సహకారం: ఇళ్లలోని ఎలక్ట్రానిక్ వ్యర్థాలు, ప్లాస్టిక్, పొడి చెత్తను నేరుగా ‘క్లాప్ మిత్రల’కే అందించాలి.
- ఆహ్లాదకర వాతావరణం: పరిశుభ్రంగా ఉన్న చోట చెత్త వేయడానికి ఎవరూ సాహసించరు. కాబట్టి మన పరిసరాలను ఆహ్లాదకరంగా, ఆరోగ్యకరంగా ఉంచుకోవడం ద్వారా చెత్త సమస్యను మూలాల నుంచే అరికట్టవచ్చు.
గ్రామ, మండల, జిల్లా స్థాయిల్లో ముమ్మరంగా సాగుతున్న ఈ అవగాహన కార్యక్రమాల్లో అధికారులు, స్థానిక నాయకులు మరియు పెద్ద సంఖ్యలో ప్రజలు పాల్గొని విజయవంతం చేశారు.
