“కలియుగ వైకుంఠం తిరుమల క్షేత్రంలో భక్తుల ఆకలి తీర్చే అన్నదాన కార్యక్రమానికి ఓ భారీ విరాళం అందింది. హైదరాబాద్కు చెందిన మాక్స్ ఇన్ఫ్రా ప్రైవేట్ లిమిటెడ్ సంస్థ ప్రతినిధి బి.వి.వి.ఎస్.ఎన్. రాజు గారు శ్రీవారిపై ఉన్న భక్తితో అక్షరాల కోటి ఇరవై లక్షల రూపాయలను విరాళంగా అందజేశారు. ఆదివారం ఆలయ అదనపు ఈవో వెంకయ్యచౌదరి గారిని కలిసిన ఆయన, రంగనాయకుల మండపంలో ఈ భారీ విరాళానికి సంబంధించిన డీడీలను అందజేశారు.
ఈ విరాళంలో 44 లక్షల రూపాయలను మాతృశ్రీ తరిగొండ వెంగమాంబ అన్నప్రసాద కేంద్రంలో ఒకరోజు అన్నదాన వితరణ కోసం కేటాయించగా, మరో 76 లక్షల రూపాయలను శ్రీవేంకటేశ్వర అన్నప్రసాదం ట్రస్టుకు అందించారు. శ్రీవారి భక్తుల సౌకర్యార్థం మాక్స్ ఇన్ఫ్రా సంస్థ చేసిన ఈ ఉదారమైన సాయాన్ని టీటీడీ అధికారులు మరియు భక్తులు ప్రత్యేకంగా అభినందిస్తున్నారు. స్వామివారి సేవలో భాగస్వామ్యం కావడం పట్ల దాతలు హర్షం వ్యక్తం చేశారు.”
