చీరాల:- సెయింట్ ఆన్స్ కాలేజ్ ఆఫ్ ఇంజినీరింగ్ అండ్ టెక్నాలజీలో ఏఐ అండ్ ఎంఎల్ విభాగం ఆధ్వర్యంలో నిర్వహించిన ఏజెంటిక్ ఏఐ వర్క్‌షాప్, హ్యాకథాన్ విజయవంతంగా ముగిశాయి. విద్యార్థులకు ఆధునిక కృత్రిమ మేధస్సు సాంకేతికతపై అవగాహన కల్పించడంతో పాటు, ఆచరణాత్మక నైపుణ్యాలను పెంపొందించే లక్ష్యంతో ఈ కార్యక్రమాలను నిర్వహించారు.
కళాశాల సెక్రటరీ వనమా రామకృష్ణారావు, కరస్పాండెంట్ శ్రీమంతుల లక్ష్మణరావు తెలిపిన వివరాల ప్రకారం.. టీఆర్ టెక్ న్యూజెన్ సొల్యూషన్స్ ప్రైవేట్ లిమిటెడ్ సహకారంతో అక్టోబర్ 14 నుంచి 16వ తేదీ వరకు ఏజెంటిక్ ఏఐ వర్క్‌షాప్ నిర్వహించగా, అక్టోబర్ 17న హ్యాకథాన్ నిర్వహించారు. ఈ కార్యక్రమాల్లో విద్యార్థులు ఉత్సాహంగా పాల్గొని సాంకేతిక అంశాలపై అవగాహన పెంపొందించుకున్నారు.
వర్క్‌షాప్‌లో భాగంగా ఏజెంటిక్ ఏఐ సాంకేతికత, ఏఐ ఏజెంట్ల పనితీరు, వర్క్‌ఫ్లో రూపకల్పన, టూల్ కాలింగ్ తదితర అంశాలపై విద్యార్థులకు శిక్షణ అందించారు. సైద్ధాంతిక పరిజ్ఞానంతో పాటు ప్రాక్టికల్‌గా సాంకేతిక పరిజ్ఞానాన్ని వినియోగించే విధానాలను వివరించారు. ప్రస్తుత పరిశ్రమ అవసరాలకు అనుగుణంగా ఏఐ ఆధారిత పరిష్కారాలను రూపొందించడం, నూతన ఆలోచనలను ఆచరణలో పెట్టడం వంటి అంశాలపై విద్యార్థులకు అవగాహన కల్పించారు.
ఈ సందర్భంగా కళాశాల ప్రిన్సిపాల్ డాక్టర్ కె. జగదీష్ బాబు మాట్లాడుతూ.. మారుతున్న సాంకేతిక రంగానికి అనుగుణంగా విద్యార్థులు తమ నైపుణ్యాలను నిరంతరం మెరుగుపరుచుకోవాలని తెలిపారు. ఇలాంటి వర్క్‌షాప్‌లు, హ్యాకథాన్‌లు విద్యార్థుల్లో సృజనాత్మకతను, సమస్యలను పరిష్కరించే సామర్థ్యాన్ని పెంపొందించడంతో పాటు పరిశ్రమల్లో ఎదురయ్యే సవాళ్లను ఎదుర్కొనేందుకు దోహదపడతాయని పేర్కొన్నారు.Bapatla District City News
హ్యాకథాన్‌లో ప్రతిభ కనబరిచిన విజేతలకు బహుమతులు అందజేశారు. కార్యక్రమాన్ని విజయవంతంగా నిర్వహించడంలో ఏఐ అండ్ ఎంఎల్ విభాగాధిపతి డాక్టర్ సి.హెచ్. హరికిషన్, కోఆర్డినేటర్లు డాక్టర్ పి.ఎస్. నవీన్ కుమార్, సి.హెచ్. సురేష్ బాబు, అధ్యాపకులు కీలక పాత్ర పోషించారు. ఈ కార్యక్రమంలో కళాశాల అధ్యాపకులు, విద్యార్థులు పాల్గొన్నారు.
