Hyderabad Metro Rail ప్రాజెక్టును ప్రభుత్వం తన స్వాధీనంలోకి తీసుకోవడం ఇప్పుడు తెలంగాణ రాజకీయాల్లో అతిపెద్ద చర్చనీయాంశంగా మారింది. ముఖ్యమంత్రి రేవంత్ రెడ్డి దాదాపు ₹15,000 కోట్ల వ్యయంతో ప్రైవేటు రంగం (L&T) చేతిలో ఉన్న మెట్రోను ప్రభుత్వ పరిధిలోకి తీసుకురావడం ఒక సంచలనం. సాధారణంగా ప్రభుత్వ ఆస్తులను ప్రైవేటుపరం చేయడం చూస్తుంటాం, కానీ ఇక్కడ సీన్ రివర్స్ అయింది. ఈ నిర్ణయం రేవంత్ రెడ్డికి రాజకీయంగా ప్రతిష్టను తెచ్చిపెడుతుందా లేదా అప్పుల ఊబిలో నెడుతుందా అన్నది ఆసక్తికరంగా మారింది.
చంద్రబాబు vs రేవంత్ రెడ్డి: భిన్నమైన వ్యూహాలు
ఒకే సమయంలో ఇద్దరు తెలుగు ముఖ్యమంత్రుల నిర్ణయాలు పూర్తి భిన్నంగా ఉన్నాయి. రేవంత్ రెడ్డికి గురువుగా భావించే ఏపీ సీఎం చంద్రబాబు నాయుడు, గత ప్రభుత్వం ఏర్పాటు చేసిన మెడికల్ కాలేజీలను PPP పద్ధతిలో ప్రైవేటుకు అప్పగించే ఆలోచనలో ఉన్నారు. కేవలం ₹5,000 కోట్లతో ప్రజలకు వైద్యం అందించే కాలేజీల విషయంలో బాబు వెనుకాడుతుంటే, రేవంత్ మాత్రం Hyderabad Metro Rail కోసం ₹15,000 కోట్లు వెచ్చించడానికి సిద్ధపడ్డారు. ప్రైవేటు సంస్థల కంటే ప్రభుత్వం మెరుగ్గా పని చేయగలదని నిరూపించడమే రేవంత్ లక్ష్యంగా కనిపిస్తోంది.
ఆర్థిక భారం మరియు ఎల్ అండ్ టీ ఒప్పందం
నష్టాల సాకుతో ఎల్ అండ్ టీ రెండో దశ విస్తరణకు వెనుకడుగు వేయడంతో, కాంగ్రెస్ ప్రభుత్వం ఈ కీలక నిర్ణయం తీసుకుంది. ఇందులో భాగంగా ₹1,461 కోట్ల విలువైన షేర్లను ప్రభుత్వం బదలాయించుకోవడమే కాకుండా, ₹13,538 కోట్ల అప్పును రీఫైనాన్స్ చేయడానికి అంగీకరించింది. ఇప్పటికే రాష్ట్రంపై ఉన్న ₹8 లక్షల కోట్ల అప్పుకు ఈ Hyderabad Metro Rail భారం అదనం కానుంది. అయినప్పటికీ, భవిష్యత్తులో మెట్రో ఆస్తుల విలువ పెరిగే అవకాశం ఉండటం ప్రభుత్వానికి కలిసొచ్చే అంశం.
కేంద్రం సూచనలు మరియు రాపిడ్ ట్రాన్సిట్ వివాదం
Hyderabad Metro Rail ఫేజ్ 2 విస్తరణ విషయంలో కేంద్ర ప్రభుత్వం భిన్నమైన వాదనను వినిపిస్తోంది. పటాన్ చెరు, శంషాబాద్ విమానాశ్రయం, ఫ్యూచర్ సిటీ వంటి ప్రాంతాలకు మెట్రో కంటే ‘రాపిడ్ రైల్ ట్రాన్సిట్ సిస్టమ్’ (RRTS) మేలని కేంద్రం సూచిస్తోంది. మెట్రో మోడల్ కు ₹58,000 కోట్లు ఖర్చవుతుంటే, రాపిడ్ రైల్ కు ₹48,000 కోట్లే అవుతుందని అంచనా. ఢిల్లీ-మీరట్ తరహాలో ఈ ప్రాజెక్టును చేపట్టాలని కేంద్రం చెబుతుండటం భవిష్యత్తులో రాజకీయ వివాదాలకు దారితీయవచ్చు.
