బీసీలకు స్థానిక సంస్థల్లో 34 శాతం రిజర్వేషన్లు కల్పించేందుకు కూటమి ప్రభుత్వం నిబద్ధతతో ముందుకు వెళ్తుంటే, దీనిని రాజకీయంగా అడ్డుకునేందుకు వైసీపీ అధినేత జగన్‌మోహన్‌రెడ్డి, ఆ పార్టీ నాయకులు ప్రయత్నిస్తున్నారని ఎమ్మెల్యే గళ్ళా మాధవి అన్నారు. బీసీ రిజర్వేషన్ల అంశాన్ని రాజకీయ ప్రయోజనాల కోసం వక్రీకరించి ప్రజలను తప్పుదోవ పట్టించే ప్రయత్నం చేస్తున్నారని విమర్శించారు. బీసీలకు రాజకీయ ప్రాతినిధ్యం కల్పించేందుకు కూటమి ప్రభుత్వం చట్టబద్ధమైన మార్గంలో పోరాటం కొనసాగిస్తోందని స్పష్టం చేశారు. శుక్రవారం మంగళగిరిలోని తెలుగుదేశం పార్టీ కేంద్ర కార్యాలయంలో నిర్వహించిన మీడియా సమావేశంలో ఆమె మాట్లాడారు. కూటమి ప్రభుత్వం అధికారంలోకి వచ్చిన తర్వాత స్థానిక సంస్థల ఎన్నికలు జరగబోతున్న నేపథ్యంలో బీసీలకు స్థానిక సంస్థల్లో 34 శాతం రిజర్వేషన్లు కల్పించాలని సంకల్పించిందని గళ్ళా మాధవి తెలిపారు. బీసీలకు రాజకీయ ప్రాతినిధ్యం కల్పించాలనే నిబద్ధతతోనే ఈ నిర్ణయం తీసుకున్నామని చెప్పారు. అయితే 34 శాతం రిజర్వేషన్లను సవాల్ చేస్తూ కోర్టులను ఆశ్రయించే పరిస్థితి ఏర్పడిందన్నారు. దీనిపై న్యాయస్థానాలు విచారణ జరిపి, ప్రస్తుతం ఉన్న 50 శాతం రిజర్వేషన్ల పరిమితి నేపథ్యంలో బీసీలకు 34 శాతం రిజర్వేషన్లు కల్పించే అంశంపై న్యాయపరమైన ఇబ్బందులు ఉన్నట్లు తీర్పు వెలువరించాయని చెప్పారు. కూటమి ప్రభుత్వం బడుగు, బలహీన వర్గాలకు అండగా నిలుస్తున్న ప్రభుత్వం అన్నది రాష్ట్రవ్యాప్తంగా ప్రజలకు తెలిసిన విషయమని గళ్ళా మాధవి అన్నారు. బీసీలకు న్యాయం చేయాలి, వారికి రాజకీయ ప్రాతినిధ్యం కల్పించాలి అనే లక్ష్యంతో ప్రభుత్వం ఎంతో నిబద్ధతతో ముందుకు వెళ్తోందని తెలిపారు. అందులో భాగంగానే బీసీలకు 34 శాతం రిజర్వేషన్లు కల్పించేందుకు చట్టపరమైన చర్యలు చేపట్టామని చెప్పారు. అయితే న్యాయస్థానంలో వచ్చిన తీర్పును ఆధారంగా చేసుకుని జగన్‌ రెడ్డి, అతని నాయకులు కూటమి ప్రభుత్వంపై బురదజల్లే కార్యక్రమాన్ని ప్రారంభించారని మాధవి విమర్శించారు. ఈ అంశాన్ని కూడా రాజకీయంగా ఉపయోగించుకునేందుకు ప్రయత్నిస్తున్నారని అన్నారు. 34 శాతం రిజర్వేషన్లు ఇవ్వడం సాధ్యం కాదని తెలిసినప్పటికీ ఎందుకు కోర్టులకు వెళ్లారని, ఎందుకు హామీ ఇచ్చారని, అది కోర్టులో కొట్టివేయబడుతుందని తెలిసే ఈ ప్రయత్నం చేశారని జగన్‌మోహన్‌రెడ్డి ప్రశ్నిస్తున్నారని ఆమె తెలిపారు. బీసీలకు 34 శాతం రిజర్వేషన్లు ఇవ్వడం కేవలం ప్రజలను మభ్యపెట్టడానికే అయితే, కోర్టుల్లో సవాల్ వచ్చిన తర్వాత కూడా కూటమి ప్రభుత్వం సుప్రీంకోర్టును ఎందుకు ఆశ్రయిస్తుందని మాధవి ప్రశ్నించారు. హైకోర్టులో వాదనలు వినిపించినప్పుడు రాష్ట్రంలోని వాస్తవ పరిస్థితులను, బీసీల సామాజిక పరిస్థితులను, వారి రాజకీయ వెనుకబాటుతనాన్ని వివరించామని చెప్పారు. రాష్ట్రంలో బీసీలు 50 శాతానికి పైగా ఉన్న నేపథ్యంలో వారికి తగిన రాజకీయ ప్రాతినిధ్యం కల్పించాల్సిన అవసరాన్ని న్యాయస్థానం దృష్టికి తీసుకెళ్లామని తెలిపారు. ఎప్పటి నుంచో రాజకీయంగా వెనుకబడిపోయిన బీసీలను రాజకీయంగా చైతన్యపరిచి ముందుకు తీసుకెళ్లాల్సిన అవసరం ఉందని మాధవి అన్నారు. బీసీలకు రాజకీయ ప్రాతినిధ్యం కల్పించాలనే అంశంపై కూటమి ప్రభుత్వం తన వైఖరిని స్పష్టంగా వెల్లడించిందని చెప్పారు. హైకోర్టులో వాదనలు వినిపించినప్పటికీ తీర్పును గౌరవిస్తూ తదుపరి న్యాయపరమైన మార్గంలో ముందుకు వెళ్తున్నామని తెలిపారు. కేంద్రంలో బీజేపీ నేతృత్వంలోని కూటమి ప్రభుత్వం ఉందని, చట్ట సవరణలు చేసుకోవడం కూటమి ప్రభుత్వానికి సులభమే కదా అని జగన్‌ రెడ్డి ప్రశ్నిస్తున్నారని మాధవి పేర్కొన్నారు. అయితే చట్టాలు, న్యాయవ్యవస్థ పట్ల గౌరవం ఉన్న నాయకత్వం రాష్ట్రంలో ఉందని చెప్పారు. న్యాయస్థానం ఇచ్చిన తీర్పును గౌరవిస్తూనే, సుప్రీంకోర్టును ఆశ్రయించడం జరుగుతోందన్నారు. చట్ట సవరణ చేయాల్సిన అవసరం ఏర్పడితే అందుకు కూడా ఒక నిర్దిష్టమైన ప్రక్రియ ఉంటుందని మాధవి వివరించారు. సుప్రీంకోర్టు స్థాయిలో కూడా అవసరమైన చర్యలు తీసుకున్న తర్వాత, చట్ట సవరణ అవసరమైతే దాని కోసం కూడా 100 శాతం ప్రయత్నిస్తామని స్పష్టం చేశారు. కోర్టులో తీర్పు తమకు అనుకూలంగా రాలేదని వెంటనే వెనక్కి వచ్చి 24 శాతానికే పరిమితం చేస్తామని కూటమి ప్రభుత్వం ఎక్కడా చెప్పలేదని మాధవి అన్నారు. తదుపరి న్యాయపరమైన అవకాశాలను ఉపయోగించుకుంటూ బీసీలకు 34 శాతం రిజర్వేషన్లు కల్పించేందుకు ప్రయత్నిస్తామని చెప్పారు. గతంలో జగన్‌ రెడ్డి ప్రభుత్వం మాత్రం 24 శాతానికే రిజర్వేషన్లను పరిమితం చేసి, అంతకంటే ఎక్కువ ఇవ్వలేమన్నట్టుగా వ్యవహరించిందని విమర్శించారు. జగన్‌ రెడ్డి విధానాలను, మాటలను, నాయకత్వాన్ని, పాలనను ముఖ్యమంత్రి చంద్రబాబు నాయుడు నాయకత్వంలోని కూటమి ప్రభుత్వంతో పోల్చడం కూడా సమంజసం కాదని మాధవి అన్నారు. బీసీలకు సంబంధించిన ప్రతి అంశాన్ని రాజకీయంగా ఉపయోగించుకోవడానికి వైసీపీ ప్రయత్నిస్తోందని విమర్శించారు. బీసీలను నిజంగా రాజకీయంగా ముందుకు తీసుకెళ్లాలనే ఉద్దేశం ఉంటే కూటమి ప్రభుత్వం చేస్తున్న ప్రయత్నాలకు అండగా నిలవాలని సూచించారు. బీసీలకు ద్రోహం చేస్తున్నారని, కేవలం వారిని మభ్యపెట్టేందుకే కూటమి ప్రభుత్వం రిజర్వేషన్ల పేరుతో నాటకం ఆడుతోందని జగన్‌మోహన్‌రెడ్డి చేస్తున్న వ్యాఖ్యలను మాధవి తప్పుబట్టారు. బీసీల విషయంలో గత వైసీపీ ప్రభుత్వ పాలనను ఒకసారి ఆత్మపరిశీలన చేసుకోవాలని సూచించారు. స్థానిక సంస్థల్లో బీసీలకు రిజర్వేషన్లు ఇచ్చింది ఎవరు, ఏ ప్రభుత్వంలో బీసీలకు నిజమైన రాజకీయ ప్రాతినిధ్యం లభించిందో ఆలోచించాలన్నారు. దేశవ్యాప్తంగా బీసీలకు రాజకీయ చైతన్యం కల్పించి, వారికి రాజకీయ నాయకత్వాన్ని అందించేందుకు తెలుగుదేశం పార్టీ చేసిన కృషిని మాధవి గుర్తుచేశారు. బీసీలకు రాజకీయంగా ప్రాతినిధ్యం కల్పించాలనే ఆలోచనతోనే నందమూరి తారకరామారావు హయాంలో స్థానిక సంస్థల్లో 20 శాతం రిజర్వేషన్లు కల్పించారని తెలిపారు. బీసీలను రాజకీయంగా ముందుకు తీసుకెళ్లేందుకు అప్పట్లోనే ఎన్టీఆర్‌ చారిత్రక నిర్ణయం తీసుకున్నారని చెప్పారు. ఆ తర్వాత చంద్రబాబు నాయుడు నాయకత్వంలో బీసీలకు రాజకీయ ప్రాతినిధ్యం మరింత పెరిగిందని మాధవి తెలిపారు. బీసీలకు రాజకీయ ప్రాతినిధ్యం కల్పించడంలో టీడీపీ మొదటి నుంచి నిబద్ధతతో పనిచేస్తోందని చెప్పారు. జగన్‌మోహన్‌రెడ్డి ప్రభుత్వం అధికారంలోకి వచ్చిన తర్వాత బీసీల రిజర్వేషన్లను ఏ విధంగా కొనసాగించింది, బీసీలకు ఏ విధమైన రాజకీయ ప్రాతినిధ్యం కల్పించింది, బీసీ సామాజిక వర్గాన్ని ఏ విధంగా ఉపయోగించుకుందో ఆత్మపరిశీలన చేసుకోవాలని మాధవి అన్నారు. వైసీపీ పాలనలో బీసీలకు సంబంధించిన కార్పొరేషన్లను తొలగించారని, బీసీ సంక్షేమానికి సంబంధించిన నిధులు, పథకాల విషయంలోనూ అన్యాయం జరిగిందని ఆరోపించారు. చంద్రబాబు నాయుడు ప్రభుత్వం గతంలో బీసీల కోసం అమలు చేసిన అనేక పథకాలను కూడా వైసీపీ ప్రభుత్వం కొనసాగించలేదని మాధవి విమర్శించారు. కేవలం చంద్రబాబు నాయుడికి క్రెడిట్‌ దక్కకూడదనే ఉద్దేశంతోనే బీసీలకు ఉపయోగపడే పథకాలను, కార్యక్రమాలను నిలిపివేశారని ఆరోపించారు. బీసీలను కేవలం ఓటర్లుగా ఉపయోగించుకునేది ఎవరు, వారికి రాజకీయ ప్రాతినిధ్యం కల్పించేది ఎవరు అన్నది ప్రజలు గమనిస్తున్నారని మాధవి అన్నారు. తాను రజక సామాజిక వర్గానికి చెందిన మహిళగా ప్రత్యక్ష సాక్షిగా ఉన్నానని చెప్పారు. తన సామాజిక వర్గానికి చెందిన వ్యక్తికి గతంలో రాజకీయ ప్రాతినిధ్యం లభించిందా అని ప్రశ్నించారు. రజక సామాజిక వర్గానికి చెందిన తనకు రాజకీయ ప్రాతినిధ్యం కల్పించడం చంద్రబాబు నాయుడు నాయకత్వం వల్లే సాధ్యమైందని అన్నారు. వడ్డెర, నాయీబ్రాహ్మణ, చేనేత తదితర బీసీ సామాజిక వర్గాలకు రాజకీయ ప్రాతినిధ్యం కల్పించడం వల్ల ఆయా వర్గాల్లో ఆనందం వ్యక్తమవుతోందని మాధవి తెలిపారు. ఇది వైసీపీ ప్రభుత్వ హయాంలో జరిగిందా, లేక చంద్రబాబు నాయుడు నాయకత్వంలోని కూటమి ప్రభుత్వం హయాంలో జరుగుతోందా అన్నది ప్రజలు అర్థం చేసుకోవాలని అన్నారు. ఎవరి పాలనలో ఏ సామాజిక వర్గానికి ఎంత ప్రాతినిధ్యం లభించిందో ప్రజలే గమనిస్తున్నారని చెప్పారు. సామాజిక వర్గాలను, మతాలను ఓట్ల కోసం ఉపయోగించుకున్నది ఎవరో ప్రజలకు తెలుసని మాధవి అన్నారు. ప్రతి అంశాన్ని రాజకీయంగా మార్చి లబ్ధి పొందాలనే విధానం సరికాదన్నారు. ఇతర పార్టీలపై బురదజల్లి, నిందలు వేస్తూ రాజకీయంగా లబ్ధి పొందాలనే ఆలోచన చేతగానితనానికి ప్రతిరూపమని విమర్శించారు. ఒక అంశంపై నిజంగా చర్చించవచ్చని, అన్యాయం జరిగితే గళం విప్పవచ్చని, తప్పు జరిగితే ప్రశ్నించవచ్చని మాధవి అన్నారు. అయితే తప్పులు, అక్రమాలు, హత్యలు, కుంభకోణాలపై చిన్న తప్పులుగా మాట్లాడే వైసీపీ నాయకులు, బీసీలకు 34 శాతం రిజర్వేషన్లు కల్పించాలనే అంశంలో మాత్రం ప్రశ్నలు లేవనెత్తడం సరికాదన్నారు. వైసీపీ పాలనలో బీసీ రిజర్వేషన్లను 24 శాతానికి తగ్గించడం వల్ల దాదాపు 16,800 మంది బీసీలకు స్థానిక సంస్థల్లో రావాల్సిన రాజకీయ అవకాశాలు దూరమయ్యాయని అన్నారు. బీసీల కోసం కూటమి ప్రభుత్వం చేస్తున్న ప్రయత్నానికి వైసీపీ అండగా నిలబడుతుందా అని మాధవి ప్రశ్నించారు. కేవలం ఒక అంశం దొరికిందని దానిని రాజకీయంగా ఉపయోగించుకోవడం కాకుండా, బీసీలు నిజంగా పైకి రావాలనే ఉద్దేశం ఉంటే కూటమి ప్రభుత్వం చేస్తున్న ప్రయత్నానికి సహకరించాలని కోరారు. రాజ్యసభలో అవసరమైన సమయంలో బీసీ రిజర్వేషన్ల కోసం వైసీపీ అండగా నిలిచి ఉంటే మరింత ముందుకు వెళ్లే అవకాశం ఉండేదని మాధవి అన్నారు. బీసీల కోసం కూటమి ప్రభుత్వం చేస్తున్న పోరాటాన్ని రాజకీయంగా వాడుకోవద్దని మాధవి విజ్ఞప్తి చేశారు. కేవలం రాజకీయ కుర్చీ కోసం బీసీలను, ఎస్సీలను, ఎస్టీలను ఉపయోగించుకోవడం సరికాదన్నారు. రాజకీయ ప్రాతినిధ్యం అనేది అన్ని సామాజిక వర్గాల భాగస్వామ్యంతోనే సాధ్యమవుతుందని చెప్పారు. ప్రతి అంశాన్ని చంద్రబాబు నాయుడిని విమర్శించేందుకు మాత్రమే ఉపయోగించుకోవాలనే వైసీపీ విధానాన్ని ప్రజలు గమనిస్తున్నారని మాధవి అన్నారు. రేపు వైసీపీ పాదయాత్రలు చేస్తామని చెబుతున్న నేపథ్యంలో, ఏ అంశాలను ఆధారంగా చేసుకుని ప్రజల్లోకి వెళ్తారో చెప్పాలని ప్రశ్నించారు. బీసీలకు వైసీపీ చేసిన మేలేమిటో ముందుగా వివరించాలని సూచించారు. బీసీలకు రాజకీయ ప్రాతినిధ్యం కల్పించడంలో తెలుగుదేశం పార్టీకి స్పష్టమైన విధానం ఉందని మాధవి అన్నారు. బీసీలే పార్టీకి వెన్నెముకగా భావించే టీడీపీ, బీసీలను రాజకీయంగా ముందుకు తీసుకెళ్లేందుకు నిరంతరం కృషి చేస్తోందన్నారు. కూటమి ప్రభుత్వం కూడా బీసీలకు రాజకీయ ప్రాతినిధ్యం కల్పించేందుకు నిబద్ధతతో ముందుకు వెళ్తోందని తెలిపారు. బీసీల ప్రయోజనాల కోసం ప్రభుత్వం చేస్తున్న ప్రయత్నాలకు అడ్డంకులు సృష్టించకుండా సహకరించాలని కోరారు. ఇప్పటికే వైసీపీ పాలనను చూసి ప్రజలు ఆ పార్టీకి దూరమయ్యారని, ఇప్పుడు బీసీల అంశాన్ని కూడా రాజకీయంగా వాడుకుంటే మరింత ఇబ్బందికర పరిస్థితులు ఎదురవుతాయని హెచ్చరించారు. బీసీల హక్కులు, రాజకీయ ప్రాతినిధ్యం, సంక్షేమం వంటి అంశాలను రాజకీయ ప్రయోజనాల కోసం వాడుకోవద్దని స్పష్టం చేశారు. బీసీల ప్రయోజనాల కోసం కూటమి ప్రభుత్వం చేస్తున్న న్యాయపరమైన పోరాటానికి సహకరించాలని ఎమ్మెల్యే గళ్ళా మాధవి కోరారు.
