గన్నవరం:– ప్రధానమంత్రి నరేంద్ర మోదీ 76వ జన్మదినం, 25 ఏళ్ల ప్రజా సేవా ప్రస్థానానికి గుర్తుగా రాష్ట్రవ్యాప్తంగా 2,600 వైద్య శిబిరాలను ప్రారంభించినట్లు వైద్య, ఆరోగ్య శాఖ మంత్రి సత్యకుమార్ యాదవ్ తెలిపారు. సేవా సంకల్ప్ అభియాన్లో భాగంగా గురువారం గన్నవరం సామాజిక ఆరోగ్య కేంద్రంలో రాష్ట్రంలో తొలి వైద్య శిబిరాన్ని మంత్రి ప్రారంభించారు.
ఈ సందర్భంగా మంత్రి మాట్లాడుతూ.. ప్రజలకు ఆరోగ్య పరీక్షలు నిర్వహించి వ్యాధులను తొలిదశలోనే గుర్తించడం, అవసరమైన వారికి వైద్య సలహాలు, చికిత్స అందించడం, అవసరమైతే ఉన్నత వైద్య కేంద్రాలకు పంపించి మెరుగైన వైద్యం అందేలా చూడటం వైద్య శిబిరాల ప్రధాన ఉద్దేశమన్నారు. దశలవారీగా రాష్ట్రంలోని అన్ని ప్రభుత్వ ఆసుపత్రుల్లో ఈ శిబిరాలను నిర్వహిస్తామని తెలిపారు.
ప్రజలకు వైద్య సేవలను మరింత చేరువ చేయడంతో పాటు ఆరోగ్యంపై అవగాహన కల్పించేందుకు ఈ శిబిరాలు ఉపయోగపడతాయని చెప్పారు. చికిత్స అవసరమైన వారిని గుర్తించి వారికి నిరంతర వైద్య సంరక్షణ అందించేందుకు చర్యలు తీసుకుంటున్నట్లు తెలిపారు. మోదీ జన్మదిన వేడుకలను కేవలం సంబరాలకు పరిమితం చేయకుండా ప్రజలకు సేవ చేయడం ద్వారా నిర్వహిస్తున్నామని పేర్కొన్నారు.#BasavatarakamCancerHospitalAmaravati #NBK #AmaravatiRising #APHealth #Balakrishna #CancerCare
దశలవారీగా 60 ఆసుపత్రుల ఉన్నతీకరణ
గ్రామస్థాయి నుంచే ప్రజలకు నాణ్యమైన వైద్యం అందించేందుకు కేంద్ర ప్రభుత్వం పలు కార్యక్రమాలను అమలు చేస్తోందని మంత్రి తెలిపారు. ఆయుష్మాన్ భారత్ ద్వారా పేద కుటుంబాలకు వైద్య రక్షణ కల్పించడంతో పాటు వృద్ధులకు కూడా ఆరోగ్య భద్రతను విస్తరించినట్లు చెప్పారు. గ్రామీణ ప్రాంతాల్లో ప్రాథమిక ఆరోగ్య సేవలను బలోపేతం చేయడం, వ్యాధులను ముందుగానే గుర్తించడం, అవసరమైన వారికి చికిత్స అందించడం వంటి అంశాలకు ప్రాధాన్యం ఇస్తున్నట్లు వివరించారు.
జన ఔషధి కేంద్రాల ద్వారా ప్రజలకు తక్కువ ధరలకు మందులు అందుబాటులోకి తీసుకొచ్చినట్లు తెలిపారు. రాష్ట్రంలో 60 ఆసుపత్రుల ఉన్నతీకరణకు ప్రతిపాదనలు అందాయని చెప్పారు. గన్నవరం ఏరియా ఆసుపత్రిలో వచ్చే బడ్జెట్లో ట్రామా కేర్, డయాలసిస్ కేంద్రం ప్రారంభానికి చర్యలు తీసుకుంటామని వెల్లడించారు.
సేవా భావంతోనే జన్మదిన వేడుకలు
ప్రధానమంత్రి జన్మదిన వేడుకలను ఉత్సవాలకే పరిమితం చేయకుండా ప్రజలకు ఉపయోగపడే సేవా కార్యక్రమాలతో నిర్వహించడం మంచి సంప్రదాయమని సత్యకుమార్ యాదవ్ అన్నారు. వైద్య శిబిరాలతో పాటు రక్తదానం, ఆరోగ్య అవగాహన, ఇతర ప్రజా సేవా కార్యక్రమాలను నిర్వహిస్తున్నట్లు తెలిపారు.
ప్రజల ఆరోగ్యం, సంక్షేమం కోసం పనిచేయడమే నిజమైన ప్రజా సేవ అని పేర్కొన్నారు. మోదీ 25 ఏళ్ల ప్రజా సేవా ప్రస్థానాన్ని స్ఫూర్తిగా తీసుకుని మరింత విస్తృతంగా సేవా కార్యక్రమాలను కొనసాగిస్తామని చెప్పారు.
కూటమి ప్రభుత్వాల సమన్వయంతో అభివృద్ధి
కేంద్ర ప్రభుత్వం, రాష్ట్ర ప్రభుత్వం సమన్వయంతో పనిచేస్తున్నాయని మంత్రి తెలిపారు. ముఖ్యమంత్రి చంద్రబాబు నాయుడు, ఉప ముఖ్యమంత్రి పవన్ కల్యాణ్ నాయకత్వంలో కూటమి ప్రభుత్వం రాష్ట్ర అభివృద్ధి, ప్రజా సంక్షేమానికి ప్రాధాన్యం ఇస్తోందన్నారు. కేంద్రం అందిస్తున్న సహకారాన్ని రాష్ట్ర అవసరాలకు అనుగుణంగా వినియోగించుకుంటూ ప్రజలకు మెరుగైన సేవలు అందించేందుకు ప్రభుత్వం కృషి చేస్తోందని చెప్పారు.
పేదల సంక్షేమమే ధ్యేయం
మోదీ ప్రజా జీవితంలోకి వచ్చిన నాటి నుంచి పేదలు, బడుగు, బలహీన వర్గాల సంక్షేమానికి ప్రాధాన్యం ఇస్తున్నారని మంత్రి తెలిపారు. ప్రభుత్వ పథకాల ప్రయోజనాలు అర్హులకు నేరుగా అందేలా చర్యలు చేపట్టినట్లు చెప్పారు. పారదర్శక పాలనతో పాటు దేశ అభివృద్ధికి అవసరమైన మౌలిక వసతుల కల్పనకు ప్రాధాన్యం ఇస్తున్నట్లు వివరించారు.
‘స్త్రీ శక్తి’తో ఆసుపత్రుల్లో పెరిగిన ఓపీ
మహిళలను ఆర్థికంగా బలోపేతం చేయడం ద్వారా కుటుంబాలను బలోపేతం చేయవచ్చనే ఉద్దేశంతో కేంద్ర, రాష్ట్ర ప్రభుత్వాలు పలు కార్యక్రమాలను అమలు చేస్తున్నాయని మంత్రి తెలిపారు. స్వయం ఉపాధి, చిన్న వ్యాపారాలు, రుణ సదుపాయాల ద్వారా మహిళలకు అవకాశాలు కల్పిస్తున్నట్లు చెప్పారు.
రాష్ట్రంలో అమలు చేస్తున్న ‘స్త్రీ శక్తి’ ఉచిత బస్సు ప్రయాణ పథకం ద్వారా మహిళలకు ప్రయోజనం కలుగుతోందని, దీని ప్రభావంతో ఆసుపత్రుల్లో మహిళల ఓపీ కూడా పెరిగిందని మంత్రి పేర్కొన్నారు.
ఈ కార్యక్రమంలో స్థానిక ఎమ్మెల్యే వెంకట్రావు, ఎన్హెచ్ఎం రాష్ట్ర ప్రాజెక్టు డైరెక్టర్ విజయలక్ష్మి, వైద్య శిబిరాల రాష్ట్ర పర్యవేక్షకుడు డాక్టర్ సతీష్, ఇతర అధికారులు పాల్గొన్నారు.
