గుంటూరు:– కర్నూలు జిల్లా ఆత్మకూరు రూరల్ ప్రాంతంలో ఎన్నికల విధులు నిర్వహిస్తున్న సాక్షి దినపత్రిక రిపోర్టర్ సుబ్బారెడ్డిపై గుర్తుతెలియని వ్యక్తులు దాడి చేసి గాయపరిచిన ఘటనను ఆంధ్రప్రదేశ్ యూనియన్ ఆఫ్ వర్కింగ్ జర్నలిస్ట్స్ (APUWJ) తీవ్రంగా ఖండించింది. విధి నిర్వహణలో ఉన్న జర్నలిస్టుపై దాడికి పాల్పడిన వారిని తక్షణమే గుర్తించి అరెస్టు చేయడంతో పాటు, బాధ్యులపై కఠినమైన చట్టపరమైన చర్యలు తీసుకోవాలని యూనియన్ నాయకులు డిమాండ్ చేశారు.
ఈ ఘటనను నిరసిస్తూ APUWJ ఆధ్వర్యంలో గుంటూరులో జర్నలిస్టులు నల్ల బ్యాడ్జీలు ధరించి నిరసన కార్యక్రమం నిర్వహించారు. అనంతరం జిల్లా కలెక్టర్ సి.ఎం. సాయికాంత్ వర్మ, జిల్లా ఎస్పీ వకుల్ జిందాల్‌కు వినతిపత్రాలు అందజేశారు.
ఈ సందర్భంగా APUWJ జిల్లా అధ్యక్షుడు ఎస్.ఎన్. మీరా, కార్యదర్శి రాంబాబు మాట్లాడుతూ ప్రజాస్వామ్యంలో జర్నలిస్టులు ప్రజలకు, ప్రభుత్వానికి మధ్య వారధిగా ఉంటూ ప్రజా సమస్యలను వెలుగులోకి తీసుకువస్తున్నారని తెలిపారు. అలాంటి జర్నలిస్టులు విధి నిర్వహణలో ఉన్న సమయంలో దాడులకు గురికావడం ఆందోళనకరమని పేర్కొన్నారు. ముఖ్యంగా ఎన్నికల విధుల్లో ఉన్న రిపోర్టర్‌పై దాడి జరగడం జర్నలిస్టుల భద్రతపై తీవ్ర ఆందోళన కలిగిస్తోందన్నారు.
జర్నలిస్టులపై దాడులు పత్రికా స్వేచ్ఛకు విఘాతం కలిగించడమే కాకుండా ప్రజాస్వామ్య వ్యవస్థకు ముప్పుగా పరిణమిస్తాయని నాయకులు పేర్కొన్నారు. వార్తా సేకరణ కోసం క్షేత్రస్థాయిలో పనిచేసే జర్నలిస్టులకు తగిన రక్షణ కల్పించాల్సిన బాధ్యత ప్రభుత్వంతో పాటు పోలీసు యంత్రాంగంపై ఉందని స్పష్టం చేశారు.Guntur City News
సుబ్బారెడ్డిపై దాడికి పాల్పడిన వ్యక్తులను వెంటనే గుర్తించి అరెస్టు చేయాలని, దాడికి గల కారణాలు, ఘటన వెనుక ఉన్న వ్యక్తుల పాత్రపై సమగ్ర విచారణ జరిపించాలని డిమాండ్ చేశారు. భవిష్యత్తులో ఇలాంటి ఘటనలు పునరావృతం కాకుండా జర్నలిస్టుల రక్షణకు ప్రభుత్వం ప్రత్యేక చర్యలు చేపట్టాలని కోరారు. బాధిత జర్నలిస్టుకు న్యాయం జరిగే వరకు జర్నలిస్టు సంఘాలు ఐక్యంగా పోరాటం కొనసాగిస్తాయని హెచ్చరించారు.
గుంటూరు జిల్లా కలెక్టర్, ఎస్పీ ఈ ఘటనను తీవ్రంగా పరిగణించి రాష్ట్రస్థాయి అధికారులతో మాట్లాడి తక్షణ చర్యలు చేపట్టాలని వినతిపత్రంలో విజ్ఞప్తి చేశారు.
ఈ కార్యక్రమంలో జాతీయ, రాష్ట్ర, జిల్లా, నగర స్థాయి నాయకులు నక్కా మాధవరెడ్డి, ఆది గిరిధర్, పలివర్తి శ్రీనివాసరావు, సుపర్ణ, కందా ఫణికుమార్, కిరణ్, శ్రీనివాసరావు, షరీఫ్, సుబ్బారావు, కె. వెంకయ్య, కార్తీక్, పరశురాం, శ్రీధర్, కోటేశ్వరరావుతో పాటు అనుబంధ సంఘాల సమ్నా నాయకులు, సీనియర్ పాత్రికేయులు, వివిధ మీడియా సంస్థల ప్రతినిధులు, జర్నలిస్టులు పెద్ద సంఖ్యలో పాల్గొన్నారు.
నల్ల బ్యాడ్జీలు ధరించి నిరసన తెలపడం ద్వారా జర్నలిస్టుల ఐక్యతను చాటిన నాయకులు.. సుబ్బారెడ్డిపై దాడికి పాల్పడిన వారిని తక్షణమే అరెస్టు చేసి బాధితుడికి న్యాయం చేయాలని మరోసారి డిమాండ్ చేశారు.
