మచిలీపట్నం:-కృష్ణా జిల్లాలో వ్యాపార, పారిశ్రామిక రంగాల విస్తరణే లక్ష్యంగా జిల్లా యంత్రాంగం కీలక నిర్ణయం తీసుకుంది. వ్యాపారవేత్తలు ఎదుర్కొంటున్న సమస్యల త్వరితగతిన పరిష్కారానికి మరియు కొత్త ఔత్సాహికులకు ప్రోత్సాహాన్ని అందించేందుకు ఈ నెల 17వ తేదీన కలెక్టరేట్ ప్రాంగణంలో “ఇండస్ట్రియల్ బిజినెస్ మీట్” నిర్వహించనున్నట్లు జిల్లా కలెక్టర్ డీకే బాలాజీ వెల్లడించారు. శనివారం ఆయన వీడియో సందేశం ద్వారా జిల్లాలోని పారిశ్రామికవేత్తలు, ఔత్సాహిక వ్యాపారులను ఉద్దేశించి మాట్లాడారు.
ఇటీవల కృష్ణా విశ్వవిద్యాలయంలో నిర్వహించిన ‘వన్ ఫ్యామిలీ–వన్ ఎంటర్ప్రెన్యూర్’ వర్క్షాప్కు పారిశ్రామిక వర్గాల నుంచి విశేష స్పందన లభించిందని, ఆ కార్యక్రమ స్పూర్తికి కొనసాగింపుగానే ఈ ప్రత్యేక బిజినెస్ మీట్ను ఏర్పాటు చేస్తున్నామని కలెక్టర్ స్పష్టం చేశారు.Krishna district news :జగత్ ప్రకాశ్ నడ్డాకు విజయవాడ విమానాశ్రయంలో స్వాగతం
సింగిల్ విండో తరహాలో సమస్యల పరిష్కారం:
ఈ సమావేశం కొత్తగా పరిశ్రమలు స్థాపించాలనుకునే వారికి, ఇప్పటికే వ్యాపారాలు నిర్వహిస్తూ సమస్యలు ఎదుర్కొంటున్న వారికి ఒక వేదికగా నిలుస్తుందని కలెక్టర్ తెలిపారు.
- అనుమతులు – సహకారం: కొత్త వ్యాపారాలకు కావలసిన ప్రభుత్వ అనుమతులు, వివిధ శాఖల నుంచి లభించే రాయితీలు, అవసరమైన సహాయ సహకారాలపై అధికారులు ఈ మీట్లో మార్గదర్శకత్వం చేస్తారు.
- స్పాట్ పరిష్కారం: జిల్లా యంత్రాంగంలోని అన్ని ప్రధాన శాఖల అధికారులు కలెక్టర్ ఆధ్వర్యంలో నేరుగా అందుబాటులో ఉంటారు. పారిశ్రామికవేత్తలు లేవనెత్తే సమస్యలను చట్టపరిమితులకు లోబడి వీలైనంత త్వరగా పరిష్కరిస్తారు.
ఇతర ప్రాంతాల వారికీ స్వాగతం:
కేవలం జిల్లా వారే కాకుండా, కృష్ణా జిల్లాలో పెట్టుబడులు పెట్టడానికి, వ్యాపారాలు ప్రారంభించడానికి ఆసక్తి ఉన్న ఇతర జిల్లాల వ్యాపారవేత్తలకు కూడా కలెక్టర్ ఆహ్వానం పలికారు. అధికారులతో ప్రత్యక్షంగా చర్చించి అవకాశాలను పరిశీలించేందుకు ఇది మంచి అవకాశమని పేర్కొన్నారు.
ముఖ్య సమాచారం:
- సమావేశ తేదీ: సెప్టెంబరు 17, 2026
- వేదిక: జిల్లా కలెక్టరేట్ ప్రాంగణం, మచిలీపట్నం
- మరిన్ని వివరాలకు సంప్రదించాల్సిన నంబరు: 9989092288
కృష్ణా జిల్లాను పారిశ్రామికంగా ముందంజలో నిలిపేందుకు ఏర్పాటు చేస్తున్న ఈ అవకాశాన్ని వ్యాపారవేత్తలు, ఔత్సాహికులు సద్వినియోగం చేసుకోవాలని జిల్లా పౌర సంబంధాల అధికారి (I&PR) ఒక ప్రకటనలో కోరారు.
